BAUCAU, 05 marsu 2024 (TATOLI) – Veteranu Austrália apoia ekipamentu médiku hamutuk item 770 ba Klínika Veteranu David Alex ‘Daitula’ Baucau.
Prezidente Konsellu Munisipál Kombatente Libertasaun Nasional (CMCLN, sigla portugés) Baucau, Fernando ‘Bere Du’u’ Gusmão, esplika, veteranu Austrália deside ajuda ekipamentu hirak-ne’e tanba bazea ba prosposta realsiona ho klínika refere nia situasaun no difikuldade durante halo tratamentu ba pasiente sira.
“Apoia ida-nee ho sentidu boot tebes, tanba ema preokupa ho kondisaun veteranu nian maske ita la fo buat ida ba sira-nia povu,” Prezidente CMCLN Baucau hateten iha Vila Antiga, tersa ne’e.
CMCLN Baucau agrade governu Austrália liuhosi veteranu sira no sente kontente tanba ekipamentu hirak-ne’e bele ona hamenus difikuldade inklui fasilita médiku sira hodi halo tratamentu ba pasiente sira liuliu veteranu sira-ne’ebé sofre moras.
Beredu’u husu ba veteranu sira bele hakbesik aan ba klínika Daitula saúde hodi halo tratamentu pesóal saude sira bainhira hasoru situasaun difisil liuliu saúde.
“Ekipamentu barak mak apoia hanesan sasan raiu-xís nian, operasaun nian,” Beredu’u akresenta.
Hosi item 770 komposta hosi ekipamentu ospitál supplies kaixa 498, eye glasses-tested kaixa 25, drip stands tolu, hospital bed linen lima, oxy bottle holders 12, Crutches 67, first aid metal cabinet ida, specialty treatment chairs 20 no seluk tan ho tótal orsamentu $1,616.00.
Jornalista : Natalino Belo
Editór : Evaristo Soares Martins
