DILI, 06 marsu 2024 (TATOLI) – Ministru Komérsiu no Indústria (MCI), Filipus Nino Pereira, dehan, MCI kompromete atu kontinua programa Kréditu Suave hodi diversifika ekonomia Timor-Leste nian.
“MCI kompromete atu kontinua programa Kreditu Suave ne’ebé implementa ona husi Governu uluk ho objetivu atu fó kréditu ba emprezariedade timoroan sira hodi hala’o sira-nia negósiu hodi diversifika kreximentu ekonómiku iha nasaun ne’e,” Nino Filipus Pereira hateten ba TATOLI, foin lalais ne’e.
Nino Pereira hatutan, agora daudaun, MCI servisu hamutuk ho Banku Nasionál Timor-Leste (BNCTL) hodi fasilita kréditu ba emprezáriu sira liuhosi programa kréditu Suave tanba ne’e sira ne’ebé iha interrese bele aprezenta proposta planu negósiu ida ba MCI atu avalia no tuirmai bele asesu ba kréditu Suave hodi dezenvolve sira-nia negósiu hodi diversifika sira-nia família no nasaun nia ekonomia.
“Hau enkoraja parte interresadu sira atu aprezenta proposta planu negósiu ida ba MCI atu halo avaliasaun no tuirmai sei asesu ba Kréditu Suave hodi hala’o ita-nia atividade negósiu nian hodi diversifika kreximentu ekonómiku nasaun nian,” nia hateten.
Iha sorin seluk, Governadór Banku Sentral Timor-Leste (BCTL), Helder Lopes, hateten progresu dezenvolvimentu ekonómiku nasaun nian, depende maka’as ba emprezáriu sira, tanba ne’e Governu hala’o papél ida hodi fasilita emprezariedade, ida-ne’ebé mak liuhusi kolaborasaun ho banku balun iha Timor-Leste inklui BNCTL hodi implementa programa ‘Suave Credit’ iha Timor-Leste.
“Governu liuhusi MCI kontinua implementa programa Kréditu Suave hodi fasilita emprezariedade hodi empresta osan hodi dezenvolve sira-nia atividade negósiu. Dezenvolvimentu kreximentu ekonómiku iha nasaun ne’e depende maka’as ba setór privadu tanba ne’e Governu sei kontinua fasilita setór privadu atu hala’o papél ativu iha dezenvolvimentu kreximentu ekonómiku iha nasaun ne’e liuhusi atividade negósiu sira,” Helder Lopes nia esplika.
Governadór BCTL kontinua enkoraja no motiva emprezariedade sira no setór privadu atu empresta osan husi programa kreditu Suave hodi dezenvolve atividade emprezariál sira hodi ajuda Governu atu avansa kreximentu ekonómiku nasaun nian iha Timor-Leste.
To’o ohin loron, Governu liu husi MCI aloka ona tokon $50 ba BNCTL ba programa kreditu Suave tanba ne’e husu ba setór privadu no emprezariedade sira ne’ebé iha interese atu aprezenta proposta planu asaun negósiu ida atu asesu ba kréditu ne’e ho taxa-interrese besik 3%.
Jornalista: Felicidade Ximenes
Editór: Rafael Ximenes de A. Belo
