DÍLI, 13 Juñu 2026 (TATOLI) – Kónsul Jerál Timor-Leste iha Belfast, Irlanda Norte, Abreu Ximenes Correia, informa katak sidadaun Timoroan sira ne’ebé hela no serbisu iha rai-ne’e kontinua moris iha kondisaun seguru, maski rejiaun ne’e enfrenta hela situasaun manas ho protestu violentu anti-migrante.
Nia hateten, to’o agora, Kónsul Jerál seidauk simu informasaun kona-ba vitima Timoroan ruma ne’ebé mak hetan afetadu diretamente husi protestu violentu ne’e.
“Kónsul Jeral Timor-Leste iha komunikasaun di’ak ho parte hotu-hotu, hatudu neutralidade iha situasaun hotu no sei kontinua mantein no kaer metin meiu ida ne’e ba oin,” Abreu ba Tatoli via telefone, ohin.
Protestu violentu ne’e mosu hafoin akontesimentu ida envolve vítima sidadaun lokál Stephen Ogilvie, 40, ne’ebé sofre kanek grave hafoin hetan sona husi suspeitu sidadaun migrante husi Sudão.
Polísia halo ona detenasaun ba suspeitu sidadaun sudanéz ne’e, 30, ne’ebé tama Irlanda Norte liuhosi Repúblika Irlanda, no agora hetan akuzasaun tentativa omisídiu.
Vítima Stephen Ogilvie kontinua simu tratamentu intensivu iha ospitál. Enkuantu, motivu husi atake ne’e seidauk fo sai klaru.
Akontesimentu ne’e rezulta ba protestu anti-imigrasaun boot iha Belfast, ne’ebé akontese iha Segunda no Tersa-feira kalan, inklui sunu transporte sira no estraga edifísiu no infraestrutura sira.
Polísia lokál organiza kedas mobilizasaun boot hodi kontrola situasaun no prevene violénsia atu labele fo impaktu ba migrante sira.
Tuir informasaun husi autoridade, to’o agora, protestu anti-migrasaun ne’e seidauk rezulta vítima ruma mak mate.
Jornalista: Camilio de Sousa
Editór: Filomeno Martins
