DILI, 07 marsu 2024 (TATOLI)—Prezidente Sentru Komunitáriu Aprendizajen (SKA) Moravidamascal Caicoli, Luis dos Santos, hateten SKA Moravidamascal planea atu estabelese formasaun Tékniku Vokasionál hodi transforma joven sira liuhosi programa industrializasaun.
Notísia Relevante: SKA Cristo Rei Creativo menus sala-de-aula difikulta prosesu aprendizajen
“SKA ne’e iha inisiativa atu estabelese tan formasaun Tékniku Vokasionál ne’ebé halai liubá programa industrializasaun, nune’e oinsá ita transforma ita-nia joven sira. Tanba, liuhosi aprende teória ba prátika mak sei aumenta ita-nia joven sira-nia abilidade, nune’e bainhira ramata bele loke mesak kampu traballu ba aan rasik,” Prezidente SKA Moravidamascal ne’e hateten ba Agência Tatoli, iha SKA Caicoli, kinta ne’e.
Programa industrializasaun hosi produtu lokál ba produtu modernu no bele fornese ba supermerkadu sira, nune’e hetan netik osan hodi bele apoia ba SKA ne’e rasik.
“Formasaun industrializasaun ne’e ha’u rasik mak sai matadalan ba estudante sira hodi aprende. Tanba ha’u iha esperiénsia kona-ba industrializasaun ne’e no daudaun ne’e ha’u koordena ona ho xefe suku Caicoli, Hipólito Ximenes, kona-ba rai ka fatin ne’ebé mak ami atu estebelese formasaun ne’e,” nia dehan.
Objetivu hosi estabelesimentu formasaun ne’e atu aumenta joven sira-nia matenek ba iha industrializasaun nian no kapasita sira atu oinsá bele hamriik mesak hodi buka servisu ba aan rasik no ba ema seluk.
Ba formasaun refere no planu ba manuál formasaun ne’e, orsamentu SKA ida-ne’e nian kuaze rihun $1 entaun bele bele fasilita no bele realiza programa ne’e.
SKA Moravidamascal ne’e ho nia prosesu aprendizajen la’o di’ak no tuir matadalan ensinu rekorrente nian, no daudaun ne’e SKA ne’e iha nia estudante hamutuk na’in-35.
“SKA ida-ne’e iha programa rua mak prezensiál no semi prezensiál. Agora, kategoria prezensiál ne’e, ita fó opurtunidade ba labarik ne’ebé la halo atividade no mai ho obrigatoriamente konsentra hodi tuir aula semana ida dala tolu. Ba kategoria semi prezensiál mak sira-ne’ebé servisu no hetan de’it oráriu ekstra ne’ebé profesór fó ba sira hodi estuda iha uma depois presiza mak konfirma ba profesór. Ida-ne’e mak durante ne’e ita halo iha sentru ne’e,” nia hateten.
“Tanba, objetivu ne’e atu fó espasu ka fó opurtunidade ba ita-nia joven ne’ebé labele finaliza sira-nia estudu iha edukasaun formál tanba kestaun ekonómia no forma família sedu, entaun iha SKA ne’e implementa semi prezensiál no prezensiál,” nia esplika.
SKA ne’e kada tinan hetan apoiu orsamentu ba realizasaun atividade no programa hosi Ministeriu Edukasaun (ME) liuhosi dirasaun rekorrente nian hamutuk rihun $3.
Hosi 2016 to’o ohin loron (2024), SKA ida-ne’e fó diploma ba ema kuaze 300 no iha tinan 2023 konsege fó diploma 23 ba estudaante remata iha faze V (cinco) nian.
“Iha tinan ne’e, ita rejista tan estudante hamutuk 35 ho nia profesór permanente hamutuk na’in-tolu (3) ne’ebé hanorin matéria sia (9) hanesan matemátika, siénsia sosiál no naturál, língua portugeza, inglés, dalen tetún, edukasaun sívika, dezenvolvimentu vida sosiál no seluk tan,” nia dehan.
Notísia Relevante: ME prevee rihun $409.3 ba programa ensinu rekorrente
Jornalista : Osória Marques
Editór : Cancio Ximenes
