COVALIMA, 22 Abríl 2024 (TATOLI) – Konsellu Koordenasaun Munisípiu Covalima diskute esbosu Planu Dezenvolvimentu Integradu Munisipál (PDIM) 2025 ne’ebé kontein projetu 30 iha Planu Asaun Anuál (PAA).
“Prosesu elaborasaun Planu Asaun Anuál 2025 ne’e ami diskute durante loron neen hamutuk ho diretór munisipál sira ne’ebé partisipa másima maske la tuir nia kalendáriu. Tanba haree ba situasaun ami konsege finaliza ona no daudaun ne’e diskute hela ezbosu Planu Integradu Munisipál [PIM]”, Prezidente Autoridade Munisípiu Covalima, Miguel Armada Cardoso, informa, ohin.
Autoridade ne’e dehan, iha diskusaun fó importánsia ba halo diskusaun ba esbozu PAA 2025, tanba Covalima sai ona autoridade, nune’e PAA tenke trasa ho di’ak tanba bainhira la halo diskusaun ho sériu, iha 2025, sei la orsamenta.
Diretór Servisu Munisipál ba Planeamentu Integradu no Dezenvolvimentu (SMPID), Carlito Barros Reis, esplika katak, bazeia ba rezultadu PAA 2025, Covalima aprezenta proposta projetu 30.
“Atu implementa proposta projetu 30 ho nia estimativa orsamentu $8.630.294,24. Ita la garante proposta atu pasa hotu. Iha 2025, se Governu sentrál aloka orsamentu milliaun ida-resin, ita sei implementa projetu hitu iha tinan oin hanesan reabilitasaun estrada rurál iha suku Beco, postu Suai ho orsamentu $359.765,85, reabilitasaun estrada iha suku Maudemo ho orsamentu $368.548 no kanalizasaun bee-moos ho orsamentu $158.356,65”, nia informa.
Aleinde ne’e, kriasaun postu saúde no rezidénsia ba médiku iha postu Fatumea ho estimativa orsamentu $497.719,47, rekonstrusaun mini merkadu iha Fatululik ho osan $168.895,78, kanalizasaun bee-moos iha Maucatar $65.665,52 no konstrusaun rezidénsia ba médiku iha Fohorem $289.858,58.
Bazeia ba matríz SMPID, munisipíu atu implementa projetu haree ba nia númeru, benefisiáriu no depende Governu sentrál aloka orsamentu.
Alokasaun orsamentu ba Covalima iha 2024 hamutuk millaun $7,3 ne’ebé nia ezekusaun atinje ona 20,5%. Verba ne’e finansia programa 13, sub-programa 31 ho atividade 74 tuir planu asaun anuál ne’ebé aprezenta husi diretór munisipál-sira.
Jornalista: Celestina Teles
Editora: Maria Auxiliadora
