BOBONARU, 10 Juñu 2026 (TATOLI) – Abitante sira preokupa ho kondisaun estrada iha Knua Bia Sale-Anan, aldeia Ritabou, suku Ritabou, postu administrativu Maliana, munisípiu Bobonaru, tanba tempu udan nakonu ho tahu, ne’ebé difikulta tebes movimentasaun públiku ba atividade ekonómika, saúde no edukasaun.
“Ami-nia estrada ne’e grave tebes. Família balun moras atu bá ospitál ita presiza hulan de’it to’o estrada boot. Fatin karreta tama la di’ak, depois ami-nia alin, oan sira atu bá eskola mós susar. Sira atu liu bá sorin mós araska tanba hakur mota, entaun tenke liu dalan ne’e maski tahu. Ami mós atu lori produtu lokál bá merkadu la di’ak”, Abitante Ritabou Cirilio Soares informa ohin.
Notísia relevante: Estrada iha Uat-Ritabou aat, komunidade husu atensaun Governu
Luciano Evaristo, membru komunidade Ritabou mós dehan problema kona-ba estrada ne’e hato’o beibeik ona ba autoridade suku atu rezolve liuhusi Programa Nasionál Dezenvolvimentu Suku (PNDS), maibé to’o agora laiha rezultadu atu halo konstrusaun ba estrada ho distánsia kilómentru ida-resin ne’e.
Nia rekomenda ba parte kompetente atu tau prioridade ba estrada referida tanba área Bia Sale-Anan iha potensía ba setór agrikultura no ortikultura.
“Ami iha batar, hare, modo, ai-fuan no seluk tan. Estrada ne’e sai preukupasaun boot ba ami. Iha tempu bailoron ami bele halo mobilizasaun bá merkadu no fatin ne’ebé de’it, más tempu udan ne’e difisil tanba tahu nakonu. Udan ona, dalan tun mai ne’e ita haree hanesan mota”, dehan.
Ba kestaun ne’e, Xefe suku Ritabou, Maximiano dos Santos Araújo, rekoñese estrada referida aat duni, tanba ne’e autoridade suku sei buka meiu hodi rezolve liuhusi orsamentu adisionál PNDS tinan 2026.
“Sira iha aldeia Ritabou ne’e PNDS tama ona. Tinan kotuk iha aldeia Moleanan. Ita hakarak osan adisionál ne’e karik iha rezolve ida-ne’e, más labele tanba osan la to’o. Tanba ne’e mak tinan ne’e ita hanoin osan adisionál ne’e to’o ita lori ba cor tiha”, dehan.
Nai adianta katak atu hadi’a estrada ne’e posiblidade sei akontese iha tinan 2028. “Suku Ritabou ne’e ita hotu hatene la’ós aldeia tolu ka rua de’it. Ita iha aldeia12. Programa PNDS la’o iha 2015 no kontinua fali iha 2021. Agora ita seidauk kobre hotu aldeia 12, ita foin mak aldeia sia. Ita haree 2028 bele junta ho aldeia ne’ebé nia kustu ne’e ladún maka’as”, Maximiano salienta.
Knua Bia Sale-Anan iha uma-kain 42 ho nia totál populasaun kauze 400.
Notísia relevante: Estrada iha Nunutanan-Ritabou ameasadu atu kotu
Jornalista: Sergio da Cruz
Editora: Maria Auxiliadora
