Estrada iha Uat-Ritabou aat, komunidade husu atensaun Governu
BOBONARU, 28 Maiu 2026 (TATOLI)-Komunidade sira no lideransa komunitária husu ba Governu atu tau prioridade hodi hadi’a estrada iha área Kaboke, aldeia Uat, suku Ritabou, postu administrativu Maliana, munisípiu Bobonaru, nune’e bele fasilita movimentasaun públiku.
Abitante Balbina de Araújo relata katak kondisaun estrada ne’e grave, liuliu iha tempu udan tanba nakonu ho tahu.
Notísia relevante: Abitante aldeia lima iha Ritabou difisil asesu fasilidade saúde
“Ita tun-sa’e ne’e la’o de’it. Atu bá-mai sinelus hiit de’it, ain-tanan, tanba estrada a’at, sasán uma ho hahán ne’e tula mai ami lalin de’it. Ne’e mak ami husu ba Governu tau-matan mai ami povu, koitadu haree netik ba ami-nia kampu Uat ne’e. Uma ami halo di’ak más estrada mak la di’ak, ami nia ahi, bee tama ona, hela mak estrada”, nia informa ba Tatoli, iha Uat, kinta-feira ne’e
Xefe Aldeia Uat, Júlio Leco, reforsa katak problema ne’e afeta tebes ba atividade ekonómika no saúde. “Kuandu inan isin-rua knotak moras atu partu, ami hulan de’it sa’e bá to’o estrada boot mak foin ambulánsia bele tula bá Bobonaru no Maliana. Dalaruma la’o dalan bele mós partus iha dalan de’it”, nia dehan.
Ba kestaun ne’e, Júlio Leco hato’o ona ba parte kompetente no tinan 2015 liubá ekipa téknika Obra Públika mai halo ona levantamentu dadus, maibé to’o agora laiha rezultadu atu halo reabilitasaun ba estrada ho distánsia kilómetru ida-resin ne’e.
“Ita ukun-an tinan barak ona, aldeia barak mak estrada tama, más ita-nia ne’e ezije mós Governu la tau-matan. Tinan ida-ne’e idozu sira la simu osan, tanba dehan karreta tama la di’ak, ema seidauk mai selu. Juñu agora sira la simu osan fulan neen ona”, nia adianta.
Xefe Suku Ritabou, Maximiano dos Santos Araújo, relata katak estrada ne’e seidauk tama iha prioridade ba Programa Nasionál Dezenvolvimentu Suku (PNDS), tanba suku Ritabou iha aldeia barak ho totál 12.
Aldeia Uat iha uma-kain hamutuk 224 ho nia totál populasaun 1.000-resin.
Notísia relevante: Estrada iha Nunutanan-Ritabou ameasadu atu kotu
Jornalista: Sergio da Cruz
Editora: Maria Auxiliadora
