MALIANA, 27 junu 2023 (TATOLI) – Abitante aldeia lima komposta hosi Daitete, Riti-Udu, Mahui, Halekou no Mganutu, iha suku Ritabou, postu administrativu Maliana, munisípiu Bobonaro, durante ne’e hasoru hela problema difisil atu asesu ba fasilidade saúde ne’ebé governu prepara.
Xefe suku Ritabou, Maximiano dos Santos Aroujo, hateten problema refere komunidade sira enfrenta tanba kondisaun estrada liga hosi aldeia iha rurál ba suku no postu administrativu maioria la di’ak.
“Estrada iha la’ós deihan laiha liu, iha hela, maibé iha aldeia lima ida mak dook hosi sentru saúde, dalaruma difikulta uitoan sira-nia movimentu, bainhira sira hetan moras ruma liuliu hanesan inan isin-rua sira atu partu, mai konsulta iha sentru saúde dalaruma ne’e difikulta tebes sira tanba estrada ladún di’ak, dalaruma sira partu iha uma, ho kondisaun la normál tanbá ladún mai konsulta,” nia informa ba jornalista sira iha Maliana, segunda ne’e.
Líder komunitária ne’e husu ba governu foun atu tau prioridade ba infrastrutura bázika hanesan estrada, eletrisidade no bee-moos.
Nia akresenta, governu presiza tau atensaun tanba aldeia sira hanesan Samelaun, Diru-Aban, Timatán, Ritabou no Uat parte Natarlaun, ne’ebé iha kedas vila mós difisil atu asesu ba bee-moos.
“Dalaruma ita nia nai-ulun sira halai tuir estrada sira-ne’e haree, pipa ka mangeira sira-ne’e iha, dalaruma dehan bee iha, maibé pipa mak iha laran ne’e mamuk, ne’ebé presiza haree moos ho ida-ne’e,” nia katak.
Alende ne’e presiza haree mos kondisaun Eskola Bázika Filiál (EBF) Gelokai iha parte koléjiu nia sorin ne’ebé kondisaun ladi’ak ona tanba konstrui tinan barak ona liuhosi Programa Pakote Referendu (PPR).
“Agora udan ho anin-bOot sobu tán tiha ona, depois to’o agora seidauk iha atensaun hosi Ministériu Edukasaun, iha tinan rua ba kotuk parese ke relatóriu hato’o tiha ona, maibé seidauk mai atu hadi’ak eskola ne’e,” Xefe suku ne’e katak.
Tuir dadus 2021 populasaun suku Ritabou hamutuk 7,881 ho totál uma-kain 1,600.
Jornalista : Sérgio da Cruz
Editór : Evaristo Soares Martins
