Estrada iha Nunutanan-Ritabou ameasadu atu kotu
BOBONARU, 13 Dezembru 2025 (TATOLI)—Estrada ligasaun husi área Hali-Mesak, Suku Odomau ba área Lurivia Aldeia Nunutanan, Suku Ritabou, Postu Maliana, Bobonaru ameasadu atu kotu, tanba obra ne’ebé Empreza Dolivaria Unipesoál, Lda, no Novalo Unipesoál, Lda, konstrui ne’e hetan estragu husi dezastre naturál kauza husi rai-halai tanba udan boot.
Komunidade, Luis Leto Berre, senti preokupa tanba kondisaun estrada ne’e difikulta tebes movimentasaun publiku no obrigatóriu komunidade Nunutanan liuliu sira husi suku Raiheu no Purugua, Postu Administrativu tenke leba-sasán la’o-ain ho distansia ne’ebé dook.
Notísia Relevante: Kompania Dolivaria-Novalu reabilita estrada liga Hali-Mesak ba Maganutu
“Agora povu sira atu lori sira-nia produtu lokál mós estrada ladi’ak, ohin dadrer tun mai motór mós la’o la di’ak. Ida-ne’e aban bainrua udan tan ne’e, rai ne’e bele ba hotu,ne’e ita atu halo nusa. Uluk, estrada ne’e la hanesan ne’e, rai ne’e metin, agora halo ida-ne’e, estrada tinan ne’e aat liután,” Nia informa ba jornalista sira iha terrenu, sábadu ne’e
Delegadu aldeia Riti-Udu ne’e husu ba kompaña konstrutora atu halo normalizasaun imediata nune’e bele fasilita movimentasaun públiku tanba bainhira tempu udan pontu a’as liu estrada refere bele kotu totál.
“Ami presiza karreta ho motór mós ba-mai di’ak, tula ami-nia sasán mós. Se lae hanesan ne’e, ohin mai kareta hatun ema, fakar sasán iha dalan, se ita ba Maliana sosa ai-han no simentu ruma mai laba de’it, tanba estrada aat ona ne’e. Mane sira-ne’e di’ak, kuitadu feto sira-ne’e tutur sasán husi ne’e ba to’o uma,” nia dehan.
Xefe aldeia Nunutanan, Rui Orlando, afirma estrada iha área ne’e foin primeiravés hetan erozaun maka’as no afeta ba movimentasaun públiku.
“Antes kompaña halo ne’e ha’u xama atensaun kedas, ida suvida husi kraik sa’e mai ne’e tenke halo penahan tau Bronjong. Se laiha, mezmu ita halo halo nusa mós, nia tetap ladi’ak, maibé to’o agora nia la liga ho ami ne’e mak ikus sai hanesan ne’e. Uluk ameasa duni, maibé leten oan ne’e mak tun, ami hadi’ak bele liu. Maibé agora ne’e grave liu tinan-tinan,” nia hateten.
Líder komunitária ne’e mós preo kupa tanba obra ne’e la’o atraza no rezultadu ladun di’ak,tanba ne’e nia husu ba ekipa Tekniku Obra Publika atu halo supervizaun másimu iha terrenu.
“Liuliu rai-henek ne’e gado-gado loos, dalaruma tula husi Soso, husik iha Soso ba tula iha Memu, se’e ba tula fali iha Bulobu, fatin tolu kedas. Ami fó hatene ona ba obra públika, depois nia tarde tanba kompaña ne’e kaer projetu iha fatin barak mak ida estrada iha Genulai, ida iha Holsa-Taz ho ida-ne’e, oinsá mak nia bele foku servisu,” nia dehan
Ba Kestaun ne’e Jornalista tenta halo komfirmasaun ho Kompaña konstrutora maibé laiha terrenu.
Enkuantu tuir observasaun Tatoli nota katak kompaña nia materiál ba projetu konstrusaun Estrada ne’e iha hela terrenu.
Projetu R4D ho distánsia kilometru tolu ne’e implementa ho valór kontratu $295,820.62.
Notìsia Relevante: MOP implementa projetu estrada rurál hamutuk 170 iha tinan ne’e
Jornalista : Sergio da Cruz
Editor : Cancio Ximenes
