BOBOBARO, 11 outubru 2024 (TATOLI)-Kompañia lokál Dolivaria Unipesoál Lda Joint venture ho Kompañia Novalo Unip Lda implementa ona projetu reabilitasaun estrada rurál liga husi área Hali-Mesak, aldeia Anahun, suku Odomau ba aldeia Maganutu, suku Ritabou, postu administrativu Bobonaro, munisípiu Bobonaro.
Enkuantu projetu F4D ne’e gasta orsamentu hamutuk $295,820.00.
Abitante aldeia Maganutu, Augusta Sose Mai, senti kontente tanba ho implementasaun projetu ne’e ba oin bele fasilita komunidade halo movimentu ba mai ho transporte públiku no privada.
Notísia relevante: Tinan 2024, Bobonaro hetan projetu estrada rurál pakote 14
“Ami senti di’ak, uluk aat ami la’o-ain ba lalin sasán to’o Hali-Mesak buka kareta, agora estrada di’ak kareta tama ona, ami-nia sasán iha kedas uma oin de’it ona,” nia informa ba Jornalista sira iha terrenu, sesta ne’e.
Xefe aldeia Maganutu, Rui Orlando, agradese ba governu tanba bele responde povu nia preokupasaun.
Nia parte prontu apoia no koopera ho Kompañia implementádor atu nune’e obra ne’e bele la’o ho susesu no kualidade.
“Sira ezije atu hotu lalais, liuliu saluran ho penahan molok udan monu rai, durante ne’e fulan rua nia laran ha’u haree servisu la’o ho di’ak,” nia katak.
Enkuantu totál populasaun iha aldeia Maganutu na’in 523 no uma-kain 123.
Notisia relevante: Estrada rurál kilómetru 261 iha Bobonaro seidauk reabilita
Jornalista: Sérgio da Cruz
Editór: Evaristo Soares Martins
