DILI, 03 Juñu 2026 (TATOLI) – Autoridade Munisípiu Dili (PAM Dili) rekolla reseita hamutuk US$664 durante semana dahuluk implementasaun projetu pilótu estasionamentu iha área turístika Cristo Rei.
Prezidente PAM Dili, Francisco dos Santos, hateten katak inisiativa ne’e hanesan parte husi estratéjia Autoridade Munisípiu Dili atu buka fonte rendimentu rasik no kontribui ba reseita públika.
Tuir Francisco, sistema estasionamentu ne’e seidauk implementa ho forma permanente tanba atualmente hala’o hela hanesan projetu pilótu atu avalia ninia efikasia no impaktu antes halo lansamentu ofisiál.
“Maski projetu ida-ne’e foin implementa husi 25 Maiu to’o 1 Juñu, ami konsege ona rekolla reseita hamutuk US$664. Rezultadu ida-ne’e konsidera pozitivu, tanba ne’e ami planeia halo lansamentu ofisiál iha fulan Jullu,” dehan Francisco ba jornalista TATOLI iha nia knaar fatin iha Matadouro, Dili.
Nia esplika katak rezultadu inisiál ne’e hatudu progresu di’ak no bele sai baze ba implementasaun permanente iha futuru.
PAM Dili mós sei reforsa mekanizmu kontrolu no jestaun estasionamentu atu garante vizitante sira ne’ebé ba Kristu Rei utiliza fatin estasionamentu ne’ebé prepara ona ho responsabilidade.
Francisco admite katak iha hela vizitante balu ne’ebé seidauk hakarak utiliza estasionamentu ne’e. Maibé, nia husu komunidade atu iha konsiénsia hodi kontribui ba reseita Estadu.
“Ami labele obriga ema hotu atu para iha estasionamentu ne’e, tanba kada ema iha nia kondisaun rasik. Maibé ami husu atu iha konsiénsia katak kontribuisaun ne’e sei fila fali ba interese públiku no dezenvolvimentu Estadu,” nia dehan.
Sistema estasionamentu ne’e atualmente aplika de’it ba kareta ki’ik no motorizada sira. Enkuantu, kareta bo’ot sira la autoriza tama iha área Cristo Rei atu prevene estragus ba infraestrutura área ne’e.
“Ami permite de’it kareta ki’ik no motorizada sira atu tama. Kareta bo’ot sira labele tama atu evita danos ba infraestrutura ne’ebé iha,” hateten Francisco.
Atualmente, PAM Dili destina funsionáriu na’in-10 atu jere no kontrola operasaun estasionamentu ne’e durante loron tomak, hahú husi Segunda to’o Domingu.
Tarifa estasionamentu ne’ebé aplika mak US$1 ba kareta ki’ik, inklui viatura tipu Prado no Hilux, no US$0,50 ba motorizada sira.
Francisco dehan tan katak osan ne’ebé rekolla hosi servisu estasionamentu entrega diretamente ba diresaun kompetente hodi halo rekapitulasaun no verifikasaun hosi Departamentu Finansas PAM Dili, antes transfere ba Ministériu Finansas.
“Reseita hotu ne’ebé rekolla sei entrega tuir prosedimentu finanseiru vigora ona no utiliza ba interese Estadu no benefísiu públiku,” nia konklui.
Jornalista: Camilo de Sousa
Editór: Filomeno Martins
