DILI, 24 abríl 2024 (TATOLI) – Federasaun Voleiból Timor-Leste (FVTL) realiza formasaun ba treinadór ho nível I ho tema Technical Courses for Coaches Volleyball Level I.
Formasaun ne’e abertura hosi Diretór Nasionál Desportu Federadu Ministériu Juventude, Desportu, Arte no Kultura (MJDAK), Oscar Dias Quintas. Formasaun hahú loron 22 to’o 26 fulan-abríl tinan 2024 ne’ebé ho padraun internasionál.
Diretór ne’e hateten, Federasaun voleiból Timor-Leste, tinan naruk ona seidauk iha treinadór no árbitru nível internasionál. Formasaun ne’e hanesan oportunidade di’ak ba kandidatu treinadór no árbitru ho sertifikadu kualifikadu internasionál.
“Tanba ne’e mak formasaun ne’ebé hala’o iha rai-laran mak hanesan nível C nian no ida-ne’e nível nasionál, entaun buka tan treinadór internasionál. Aliende ne’e kada tinan sempre tau programa fó prioridade liu ba rekursu umanu ba treinadór no juíz internasionál, hó nune’e MJDAK sei fó formasaun iha 2025, bele realiza atividade ida-ne’e, tanba sei hasoru eventu internasional ida husi jogus CPLP nian ho ida-ne’e mak 2025, ne’e realiza formasaun ba arbitrajen no juíz internasionál hodi nune’e bele atende atividade jogus CPLP nian iha Timor-Leste,” Oscar Quintas hatete liuhusi nota ne’ebé Agência TATOLI asesu husi mídia MJDAK, ohin.
Iha fatin hanesan, Prezidente Federasaun FVTL, Inocêncio Araújo da Silva hateten, FVTL serbisu hamutuk hó komite Olímpiku Timor-Leste halo proposta ba Olimpic Solidarity International atu hetan formasaun ba treinadór nível I kategoria internasionál.
“Formadór sira iha formasaun ne’e mai husi nasaun Indonézia, España no Brazil, ho total formandu 22 ne’ebé kompostu husi Mane 18 no Feto na’in haat. Federasaun atinji ona rekursu umanu ne’ebé kualifikadu, diriji jogu no fó treinu ba atleta sira iha nível nasionál no munisípiu,” Inocêncio katak.
Formasaun ne’e la’o tanba Komite Olímpiku Nasionál Timor-Leste (CONTL-sigla portugés) hato’o proposta ba Olimpic Solidariety nune’e hetan apoiu finanseiru ho montante $1,000 atu responde ba formasaun ne’e.
Jornalista: Hortencio Sanchez
Editór: Rafael Ximenes de A. Belo
