COVALIMA, 30 Abríl 2024 (TATOLI) – Postu saúde Rai Hun, iha suku Beiseuk-Tilomar ne’ebé konstrui husi empreza Carame Unipesoal Lda ne’e seidauk utiliza, maibé edifísiu nia aliserse hahú nakfera.
Tanba ne’e, Ministériu Saúde (MS) halo ona análize ba konstrusaun postu ne’e, tanba aliserse nakfera la’ós kauza husi dezastre naturál, maibé obra mak laiha kualidade.
“Foin lalais ha’u tuir ona enkontru konsellu konsultivu hamutuk ho Vise-Ministru [Saúde] hodi halo análize ba konstrusaun postu saúde Rai Hun atu lori bá tribunál. Ministériu Saúde ka sé mak atu lori, ha’u mós la hatene, maibé agora sei halo hela estudu tanba konstrusaun ne’e gasta osan boot, maibé seidauk uza mak nia aliserse hahú nakfera no uma mout tuun”, Diretór Servisu Saúde Munisípiu Covalima, Domingos Sequeira informa ba Tatoli.
Postu saúde ne’e konstrui iha loron 18 agustu 2021 no finaliza iha feverreiru 2022. Tuir kontratu, empreza halo obra ho durasaun tempu fulan neen no nia nia totál orsamentu hamutuk $295.785,42
Juvenal Amaral Maia, komunidade suku Beiseuk preokupa ho kontrusaun postu saúde Rai hun tanba seidauk uza, maibe uma-laran mós nakfera hotu ona. Nia lamenta mós karak empreza la garante nia kualidade obra, nomós la selu traballadór sira-nia saláriu.
Jornalista Tatoli tenta atu konfirma ho empreza Carame Unipesoál kona-ba obra postu saúde Rai hun, maibé nia edifísiu iha Covalima laiha no iha de’it nasionál.
Jornalista: Celestina Teles
Editora: Maria Auxiliadora
