DILI, 10 Juñu 2026 (TATOLI) – Partidu Frente Revolusionária Timor-Leste Indepedente (FRETILIN) hahú halo konferénsia nivel munisipál hodi halo reorganizasaun mandatu ba estrutura sira iha baze, hafoin mak realiza konferénsia nasionál hodi preapara ba eleisaun prezidensiál iha tinan 2027.
Adjuntu Sekretáriu-Jerál FRETILIN, Flávio Maria da Silva, hateten reorganizasaun mandatu ba estrutura baze hahú husi aldeia, suku, no postu administrativu hotu ona no agora tama konferénsia munisípiu sira ne’ebé tuir planu sei ramata iha fulan-Agostu. Tanba tuir estatutu partidu, kada tinan lima halo renovasaun mandatu ba estrutura.
“Tuir planu, konferénsia nasionál sei hala’o iha tinan oin. Konferénsia ne’e sei hili membru Komité Sentrál no komisaun juridisaun no lideransa partidu [hanesan Prezidente no Sekretáriu-Jerál], karik partidu deside laiha eleisaun direita”, nia hateten.
Tuir estatutu partidu, kandidatu ba Prezidente Repúblika sei deside liuhusi reuniaun Komité Sentrál ne’ebé tuir planu sei realiza iha fulan-Jullu ka Agostu tinan ne’e.
Antes ne’e, Prezidente Komisaun Nasionál Eleisaun (CNE, sigla portugés), José Agostinho Belo, husu ba partidu sira atu realiza konferénsia no kongresu nasionál tanba Lei Partidu Polítiku ezije antes hasoru eleisaun prezidensiál iha 2027.
Jornalista: Nelson de Sousa
Editora: Maria Auxiliadora
