DILI, 07 maiu 2024 (TATOLI)–Centro Nacional Chega, Institutu Públiku (CNC, I.P) rekolla reseita $9.925,20 ba konfre Estadu, iha trimestre dahuluk (janeiru-marsu) tinan ne’e.
“Reseita sira ne’e maihusi atividade hanesan Chega tour hamutuk $501, Chega shop no Galeri $106,75, interest paid $1.655,37, taxa $ 7.662,08 ninia totál $9.925,20,” Diretora Divizaun Dezenvolvimentu Instituosional no Rekursu Umanu, Maria Arminda da Costa, informa ba Agência Tatoli, iha ninia knaar fatin, Balide, tersa ne’e.
Ba Chega tour ne’e vizitatante sira maihusi nasionál hamutuk 120 no internasional 225.
Enkuantu, CNC,I.P tinan kotuk rekolla reseita hamutuk $13.338,40 ba konfre Estadu.
Notísia relevante : CNC, I.P atribui finansiamentu $71.808 ba asosiasaun tolu
CNC, I.P bele rekolla reseita tanba nu’udar ajénsia autónoma ida hahú angrariasaun fundu liuhusi utilizasaun fasilidade ka patrimóniu ne’ebé eziste nu’udar meiu ida hodi kontribui reseita ba Estadu husi setór naun petrolíferu.
Aleinde ne’e, iha ona termu referénsia ba implementasaun atividade jestaun reseita ne’ebé hetan ona aprovasaun hosi Diretór Ezekutivu no iha ona kódigu reseita, konta bankária, sekúensia númeru seriál resivu mak autoriza Ministériu Finansa (MF) no CNC, I.P iha ona user ID hodi rejista reseita iha sistema Governamment Resource Planning (GRP).
Institutu públiku ne’e mai ho vizaun atu prezerva memória pasadu nu’udar lisaun ba povu Timor-Leste no umanidade tomak hodi hetan dame.
CNC,I.P harii iha dezembru 2016, ho misaun atu promove implementasaun husi rekomendasaun Komisaun Akollimentu, Lia Loos no Simu malu (CAVR) nian relasiona ho institusionalizasaun ba memória no promosaun direitu umanu nian liuhusi edukasaun no formasaun no solidariedade ho sobrevivente sira ne’ebé vulnerável liuhusi violasaun direitu umanu, nune’e mós rekomendasaun komún sira ba CAVR no ba Komisaun Bilaterál Verdade no Amizade (CVA) kona-ba konstrusaun sentru nasionál memória, peskiza no aprendizajen nian ida.
Jornalista : Arminda Fonseca
Editora : Julia Chatarina
