MYEXPO 2026 promove parséria negósiu no kultura entre Malázia no Timor-Leste
DÍLI, 07 Jullu 2026 (TATOLI) – Embaixada Malázia iha Timor-Leste, Tersa ne’e, ofisialmente loke MYEXPO Bazar ASEAN 2026, eventu loron rua ne’ebé realiza iha Sentru Konvensaun Dili (CCD), ho objetivu atu promove kooperasaun ekonómika no troka kultura entre nasaun membru ASEAN.
Iha serimónia abertura, Enkargadu Negósiu Embaixada Malázia, Jemimah Ujang, hateten katak bazar ne’e halibur negósiu lokál, emprezáriu no komunidade husi rejiaun Sudeste Aziátiku atu promove produtu, kultura no kulinária tradisionál, no hametin relasaun entre Malázia no Timor-Leste.
“MYEXPO 2026 la’ós deit espozisaun ida, eventu ida-ne’e mós sai plataforma atu hametin ligasaun, haburas parseria no loke oportunidade foun entre Malázia no Timor-Leste,” dehan Jemimah Ujang ba TATOLI iha CCD.
Durante eventu ne’e, negosiante, emprezáriu no reprezentante indústria sira sei iha oportunidade atu halo enkontru ho organizasaun no kompania Malázia nian husi setór oioin, hanesan agrikultura, aviasaun, ai-han no bebidas, teknolojia finanseira (fintech), turizmu, edukasaun no área seluk.
Vizitante sira mós bele partisipa iha sesaun koñesimentu B2B ho tema “Hari’i Ponte ba Negósiu: Oportunidade no Parseria Malázia–Timor-Leste”, ne’ebé sei ko’alia kona-ba oportunidade investimentu, informasaun merkadu no dalan atu haburas kolaborasaun entre negósiu sira husi nasaun rua.
Serimónia abertura MYEXPO 2026 lidera husi Enkargadu Negósiu Embaixada Malázia, Jemimah Ujang, hamutuk ho Vise-Ministra Negósius Estranjeirus no Kooperasaun, Jesuína Maria Ferreira Gomes, Komandante no Xefe Estadu-Maior Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”, no Komandante Jerál Polísia Nasionál Timor-Leste (PNTL), Afonso dos Santos.
Eventu ne’e mós hetan prezensa husi embaixadór sira husi nasaun membru ASEAN iha Timor-Leste no konvidadu importante seluk.
Jornalista: Camilio de Sousa
Editór: Filomeno Martins
