DILI, 12 Maiu 2024 (TATOLI) – Jogadór Kornelis Portela (11) susesu lori sai nia ekipa Zhavia FC husi derrota liu husi golu ikus ne’ebé nia marka iha minutu 90+2 bainhira kontra ekipa FIEL FC iha jogu kontinuasaun kopa Federasaun Futeból Timor-Leste (FFTL), ne’ebé realiza iha Estádiu Munisipál Dili, domingu loraik ne’e.
Durante minutu 90, FIEL loko-aan iha kampu laran ho rezultadu 2-1, maibé iha minutu adisionál score sai oin seluk tanba Portela responde ho golu ida hodi muda rezultadu sai empata 2-2.
Jogu ne’ebé lidera husi árbitu Pedro Braga, juíz liña Januário Salsinha, Silvino Vieira no árbitu rezerva Francisco Pereira bainhira deside jogu la’o, ekipa rua lansa kedan kontra-atake ba malu tuir kultura jogu futeból 11 nian.
Jogadór ekipa rua duni malu haleu kampu laran ho bola kabuar kór modok, husi ain ba ain. Zhavia lansa kontra ho presaun mak’aas nune’e bele buka meiu hotu atu prodús golu. Atake Zhavia nian halo monu kedan jogu FIEL nian.
Maske jogu monu maka’as, FIEL nafatin aguenta hodi hatudu jogu ho kalma, pasa bola ba-mai halo mós defensivu, la ansi halo golu bainhira seidauk iha oportunidade.
Minutu hakat ho hakmatek, jogu mós la’o ho barullu, ekipa rua kontinua halo presaun ba malu. Maske Zhavia lansa kontra maka’as maibé la hatudu rezultadu pozitivu ba ekipa, nune’e jogadór estranjeiru Baka Yoka Ozi (65) hanesan avansadu la hatudu jogu ne’ebé di’ak no treinadór Gaspar Amaral foti desizaun dada sai jogadór ne’e hodi hatama fali jogadór Delvio dos Santos (16) iha minutu 33, nune’e bele halo moris jogu.
Iha minutu hanesan treinadór FIEL Hermelio José tenta halo mudansa mós ba jogu FIEL nian hodi dada sai jogadór Alberto Martinho (8) no hatama fali avansadu Joaninho Matos (28) nune’e bele responde ba Zhavia nia atake.
Maske ekipa rua halo mudansa ba jogu maibé seidauk rezulta tan golu, maibé jogadór sira kontinua esforsu aan nune’e bele hetan oportunidade hatama golu.
Esforsu ne’ebé Zhavia halo iha minutu 41 sai duni realidade tanba jogadór Yohanes Gusmão (25) halo jogu indivíduu hodi lansa sutu ida ho distánsia dook ba guarda rede FIEL nian ne’ebé la antesipa ho di’ak, nune’e bola barullu kedan iha rede laran hodi muda rezultadu ba 1-0.
Golu ne’ebé Yohanes prodús hanesan golu ikus ba ekipa rua iha jogu primeira parte nian no lori vitória provizória ba Zhavia.
Dolar ba segunda parte, ekipa rua kontinua lansa kontra-atake. FIEL tenta hadi’a nia liña klaran ne’ebé monu maka’as iha minutu primeira parte konsege lansa atake ba Zhavia no halo jogadór Zhavia dada iis naruk no lakon bola barak.
Bainhira FIEL hetan fali nia jogu moris iha liña klaran no iha minutu 52 bainhira treinadór deside dada sai jogadór Ivan Araujo (22) hodi hatama fali jogadór Expedito Fuel (24). Desizaun ne’ebé treinadór halo fó kedan oportunidade ba FIEL hodi hetan bola barak no halo Zhavia sente presaun.
Esforsu no oportunidade hirak ne’ebé FIEL hetan la hela de’it hanesan esforsu tanba iha minutu 72 jogadór Elídio Manuel hetan bola pasa ho kalma ida husi nia amigu Expedito, nune’e nia responde kedan golu ida hodi hasai FIEL husi zero ba 1-1.
Golu ne’e halo baralla totál Zhavia nia jogu no jogadór Zhavia barak la hetan ona bola atu lansa atake ba FIEL tanba FIEL hamate tuituir Zhavia nia jogu. Husi falla barak ne’ebé Zhavia halo fó oportunidade tan ba FIEL iha minutu 74 ba jogadór Expedito Fuel (24) lansa tan golu ida hodi muda rezultadu ba 2-1.
Husi golu ne’e halo FIEL loko aan iha kampu laran, tanba garante ona vitória ba sira tanba haree husi minutu ne’ebé besik termina ona.
Maibé Zhavia la lakon esperansa hodi kontinua hatudu jogu ne’ebé bonitu. Maske minutu normál 90 termina ona no árbitu deside fó tan minutu adisionál haat no husi minutu haat ne’e Zhavia utiliza ho di’ak no ikus mai iha minutu 90+2 jogadór FIEL komete erru hasoru jogadór Zhavia besik liña oin FIEL nian no ikus mai árbitu deside fó falta ba Zhavia hodi lansa sutu livre, maibé jogadór FIEL tenke halo blokeia.
Sutu livre Zhavia ezekuta husi jogadór Kornelis Portela, sutu ne’e halo guarda rede atrapalla no ikus bola tama liu ba rede laran rezulta golu hodi dada sai Zhavia husi derrota no rezultadu tuur metin ba 2-2.
Husi golu ne’e mak determina ekipa rua nia jogu no laiha ekipa ida mak hetan vitória, tanba ekipa rua tenke fahe pontu ba malu 1-1 hodi hein fali jogu seluk tuirmai iha apuramentu grupu.
Notísia relevante: Assa FC ‘liki’ Mushila FC 1-4
Jornalista: Hortencio Sanchez
Editora: Maria Auxiliadora
