DILI, 07 Maiu 2026 (TATOLI)–Prezidente Federasaun Atletizmu Timor-Leste (FATL), Afrânio Xavier Amaral, hateten iha semana-ne’e sei realiza kurrida maratona ba kilómetru 21 hodi prepara ba eventu Dili Internasionál Maratona 2026.
”Ita hatene katak iha loron sábadu (09 Maiu 2026), ita sei halai kilometru 21 hanesan teste ida atu halo preparasaun ba Dili Internasioná Maratona ne’ebé sei realiza iha fulan-Agostu,” Afrânio Xavier Amaral hateten ba jornalista sira iha Palásiu Prezidensiál Nicolau Lobato, kinta ne’e.
Nia dehan, kurrida referida iha mudansa ba rute, no sei hahú husi Palásiu Prezidensiál, liuhusi Ministériu Finansa, Motael, Palásiu Governu, Ponte B.J. Habibie, Hotel California, Área Branka, to’o Dolok-Oan.
Husi Palásiu Governu, atleta sira sei kontra tránzitu (la sa’e ba liman karuk), maibé liuhusi Sporting nian oin, Hotel Timor, no ramata fali iha Palásiu Prezidensiál Bairru Pite.
Aleinde ne’e, reprezentante komandu operasaun, superientendente asistente Roberto Perreira dos Santos, hateten relasiona ho atividade ne’e, Komandu Jerál PNTL liuhusi Kuartél Jerál haruka ona despaixu ba Komandu Munisípiu Dili, Unidade Espesiál Polísia (UEP) no Sentru Formasaun Polísia (SFP) atu asegura rute tomak.
“PNTL preparadu ona ho planu rasik hodi asegura fatin sira-ne’ebé sei afeta ba tránzitu. Ami husu ba komunidade, komesa tuku 05h00 to’o 10h00 dadeer, atu hamenus mobilizasaun iha rute sira-ne’e, tanba kurrida sei hahú iha oras sira-ne’e,” nia dehan.
PNTL mós fó avizu katak, se sidadaun sira laiha atividade urjente, di’ak-liu hakmatek iha uma ka bele mai asiste de’it hodi fó apoiu ba atleta sira.
Objetivu husi atividade ne’e mak atu halo selesaun ba atleta nasionál sira-ne’ebé sei reprezenta Timor-Leste iha eventu Dili International Maratona iha fulan-Agostu.
Atividade ne’e sei envolve atleta hamutuk 200-resin no maratona ne’e rasik nakloke mós ba sidadaun hotu ne’ebé ho idade tinan 17 ba leten.
Jornalista : Hortêncio Sanchez
Editór : Cancio Ximenes
