DILI, 13 maiu 2024 (TATOLI)–Ministériu Edukasaun (ME) fasilita karta transferénsia estudante Pre-Eskolár Nova Tasi-tolu ba eskola seluk iha territóriu, tanba eskola ne’e rasik hetan ona markasaun ba desizaun despeju administrativu.
“Ida-ne’e ha’u ba hasoru ona Koordenadora Pre-Eskolár Nova Tasi-tolu hodi halo apoiu karta transferénsia ba estudante sira, nune’e kontinua fali estudu iha eskola. Tanba ne’e ami hein inan-aman sira-nia informasaun, sira tenke muda, Ministériu Edukasaun fasilita halo karta transferénsia muda ba eskola seluk. Ami apoiu maibé até a data inan-aman seidauk ba iha eskola ne’ebá hodi ko’alia kona-ba asuntu ne’e,” Diretór Servisu Edukasaun Munisípiu Dili, Sabino da Costa Pereira, informa ba Agência Tatoli, iha ninia knaar fatin, Comoro, segunda ne’e.
Nia dehan, bainhira Governu atu halo dezenvolvimentu ba rai ida-ne’e maka komunidade ne’ebé tama iha área atu dezenvolve presiza liberta fatin.
Notísia relevante : Koordenadora Eskola Nova Tasi-tolu: “ami prontu kontribui maibé presiza koordena malu”
Iha sorin seluk, Koordenadora Pre-Eskolár Nova Tasi-tolu, Josefina Fátima Xavier, hateten, eskola ne’e kontinua ho nia prosesu aprendizajen hanesan baibain.
“Daudaun ne’e, prosesu aprendizajen la’o hela, ita rona informasaun liuhusi konferénsia imprensa ne’ebé halo iha Tasi-tolu katak sei fó tempu fulan-ida, nune’e inísiu juñu tenke hamamuk, maibé ha’u rasik seidauk simu notifikasaun no seidauk buka fatin ba subtuisaun eskola, nia akresenta.
Eskola Pre-Eskolár Nova Tasi-tolu harii iha tinan 2014 no iha tinan 2015 hetan akreditasaun husi ME, hafoin eskola ne’e hahú loke inskrisaun no rejista estudante foun hamutuk 150, kompostu husi grupu ki’ik na’in-50 no grupu boot 100.
Husi tinan 2015 to’o 2023 eskola ne’e prodús ona estudante hamutuk 1.350 no estudante ativa daudaun ne’e iha 150.
Eskola ne’e funda husi Profesór Júlio Xavier Pacheco, ho nia manorin hamutuk na’in-haat, hanesan Koordenadora Josefina Fátima Xavier, Profesora Joaninha de Carvalho, Madalena Martins no Leopoldina Maia.
Governu tinan ne’e aloka osan $6.037,5 ba programa merenda eskolár no osan ba konsensoens eskolár hamutuk $1.237,5.
Jornalista : Osória Marques
Editora : Julia Chatarina
