DILI, 02 maiu 2024 (TATOLI)—Koordenadora Eskola Pre-Eskolár Nova Tasi-tolu, Josefina Fátima Xavier, hateten, parte eskola prontu kontribui ba desizaun despeju administrativu husi ekipa konjunta lidera husi Sekretaria Estadu Asuntu Toponímia no Organizasaun Urbanu (SEATOU), maibé presiza iha koordenasaun.
Eskola ne’e lokaliza iha área besik lagoa Tasi-tolu, aldeia 12 de Outubro, suku Madohi, postu administrativu Cristo Rei, munisípiu Dili, maski seidauk hetan notifikasaun despeju administrativu, maibé iha ona markasaun ho númeru 35.
“Ami de’it seidauk simu notifikasaun ruma husi Governu liuhusi SEATOU, ami prontu kontribui maibé presiza koordena malu ho ami tanba ita-nia eskola ne’e mós prodús ona estudante barak. Ami ne’e hakarak kolabora ho Governu ba desizaun dezenvolvimentu nasaun nian, ami kontribui ba Estadu ida-ne’e, rai ida-ne’e Estadu nian no buat ne’ebé Estadu nian fila ba Estadu, buat ne’ebé povu nian fila ba povu. Tanba ne’e importante mak kolabora malu,” Koordenadora Eskola informa ba Agência Tatoli, iha aula eskola, Tasi-tolu, kinta ne’e.
Nia dehan, Governu halo ona dezenvolvimentu no eskola ne’e prepara rekursu umanu edukasaun ba futuru, tanba ne’e presiza iha kolaborasaun no fó tempu tinan ne’e hodi estudante sira bele halo ramata estudu iha tinan letivu ne’e.
“Ami husu Governu, se bele fó ami tempu hodi ami buka lai fatin nune’e ami-nia oan sira ne’e estuda tanba daudaun ne’e prosesu aprendizajen la’o hela. Ida-ne’e tinan klaran ne’e estudante sira-ne’e ami atu lori ba ne’ebé,” nia akresenta.
Notísia relevante : Uma-kain 185 iha Tasi-tolu hetan ona notifikasaun hodi husik hela-fatin
Koordenadora Eskola haktuir, Xefe aldeia antes ne’e mai dehan eskola ne’e sei hetan sobu hotu.
“Xefe Aldeia 12 de Outubro hateten tau de’it marka depois mak ita ko’alia nia prosesu ba oin. No momentu ne’ebá ha’u hateten ami prontu no ita-boot sira bele tau sinál maibé hasai ami ho dignidade no di’ak,” nia akresenta.
Iha fatin hanesan, Reprezentante inan-aman, Joaninha de Carvalho, sente triste tanba rona informasaun Governu atu mai sobu eskola ne’e.
“Ha’u sente triste tanba eskola ne’e fasilita ona ami-nia oan sira no eskola ne’e besik ami hodi labarik kiik-oan bele asesu no apreende iha ne’e. Estadu iha dever no kompeténsia hodi hala’o nia planu programa maibé haree mós ba futuru labarik 150 ne’ebé daudaun ne’e apreende hela iha ne’e,” nia tenik.
Joaninha de Carvalho dehan, karik di’ak liu fó uluk notifikasaun ba eskola nune’e bele prepara no buka fali fatin seluk.
“Agora iha tinan klaran kuitadu lori kiik-oan sira-ne’e ba ne’ebé, ida-ne’e Estadu no Governu presiza tau mós hanoin. Ami rekomenda ba SEATOU fó lai tempu hodi ami-nia oan sira halo ramata lai nia estudu iha eskola ne’e. Tinan klaran ona kuitadu lori ba ne’ebé,” nia salienta.
Eskola Pre-Eskolár Nova Tasitolu harii iha tinan 2014 no iha tinan 2015 hetan akreditasaun husi Ministériu Edukasaun, hafoin eskola ne’e hahú loke inskrisaun no rejista estudante foun hamutuk 150, kompostu husi grupu kiik na’in-50 iha no 50 no grupu boot 100.
Husi tinan 2015 to’o 2023 eskola ne’e prodús ona estudante hamutuk 1.350 no estudante ativa daudaun ne’e iha 150.
Eskola ne’e funda husi Profesór Júlio Xavier Pacheco, ho nia manorin hamutuk na’in-haat, hanesan Koordenadora Josefina Fátima Xavier, Profesora Joaninha de Carvalho, Madalena Martins no Leopoldina Maia.
Governu tinan ne’e aloka osan $6.037,5 ba programa merenda eskolár no osan ba konsensoens eskolár hamutuk $1.237,5.
Jornalista : Osória Marques
Editora : Julia Chatarina
