DILI, 01 Juñu 2026 (TATOLI)–Estádiu Munisipál Dili sei sai hanesan palku ba drama futeból nian iha tersa (02 Juñu) aban, iha tuku 16h00, bainhira AD Santo António hasoru Ponta Leste iha jogu kontinuasaun Liga Futeból Timor-Leste segundu divizaun iha époka 2026.
Maibé jogu ne’e la’ós jogu baibain maibé hanesan markadu ho reenkontru emosionál entre treinadór AD Santo António, Eduardo Pereira, ho ninia klube tuan ne’ebé nia lidera durante tinan barak no klube Ponta Leste e’e rasik lori nia sai naran boot iha mundu futeból.
Eduardo Pereira ne’ebé asina kontratu ho AD Santo António iha inísiu tinan kotuk hafoin husik Ponta Leste tinan 2025, deklara abertamente katak jogu aban sei sai defisíl liu iha nia karreira tanba nia iha ligasaun emosionál ne’ebé forte ho Ponta Leste.
“Ha’u hamutuk ho Ponta Leste ne’e kle’ur, kuaze klube ne’e ami mak harii. Ha’u lori klube ne’e sai kampiaun iha tinan 2016 Tasa 12 de Novembru no Supertasa. Nune’e, ha’u-nia fuan nafatin iha Ponta Leste maibé Santo António mai husi instituisaun ne’ebé ha’u rasik hakna’ar an ba hanesan Polísia Nasionál Timor-Leste (PNTL) nian, maibé tanba orden ha’u tenke kumpre,” Eduardo hateten liuhusi konferénsia imprensa ne’ebé hala’o iha Estádiu Munisipál Dili, segunda ne’e.
Maske fuan ho laran ba Ponta Leste, Eduardo mantein iha nia pozisaun hodi defende klube ne’ebé mak fó ona kontratu ba nia no nia tenke hala’o servisu hotu ho profisionál maske fuan ne’e nakonu ho hahusuk.
“Ha’u profisionál ida. Bainhira ha’u lidera Santo António, ha’u promete atu fó ha’u-nia kontribuisaun tomak, ha’u-nia tempu hotu ba klube ne’e. Aban, ami sei tama kampu atu manán,” Eduardo hateten ho fiar an.
Iha fatin seluk mehi hakarak manán Ponta Leste maibé iha sorin seluk ninia relasaun emosionál ho Ponta Leste sei hanesan sasatan ida atu dehan sai ho onestu.
“Ponta Leste la’ós de’it klube ba ha’u. Sira mak família. Sira fó konfiansa mai ha’u bainhira ha’u sei treinadór iha momentu klube ne’e laiha naran. Sira halo ha’u sai treinadór ne’ebé ha’u iha ohin loron. Tanba ne’e, ha’u bele dehan ho onestu, ha’u nia fuan nafatin iha Ponta Leste,” nia hateten ho oin mean uitoan.
Eduardo Pereira lidera Ponta Leste husi 2015 to’o 2024. Iha biban ne’eba, nia konsege lori klube ne’e ba final Tasa 12 de Novembro dala rua no sempre mantein iha topu lima (5) iha Liga Futeból Timor-Leste (LFTL).
Profisionalizmu Hasoru Lealdade
Maske nune’e, Eduardo Pereira prepara ona nia jogadór sira atu kontra klube ne’ebé habahat ninia naran boot iha Estádiu Munisipál Dili.
“Ne’e mak parte defisil husi futeból profisionál. Ita tenke haketak emosaun husi serbisu. Maibé dala ruma, ligasaun ho klube uluk ne’e kle’an liu fali ida agora ne’e, maibé ha’u profisionál atu lori klube ne’e manán,” treinadór ne’e dehan.
Impaktu ba Tabela Klasifikasaun
Aleinde drama emosionál, jogu aban iha impaktu boot ba tabela. AD Santo António daudaun ne’e rekolla ona pontu tolu basá iha jogu foin lalais kontra Vila Atauru klube ne’e manán 1-0. Enkuantu Ponta Leste iha pozisaun ho pontu ida basá iha jogu primeiru empata ho Nagardjo FC no jogu segundu lakon ho FIEL FC, Vitória ba ekipa ida sei fó dalan atu hakbesik ba zona topu .
Ekipa rua mai ho motivasaun aas. Santo António foin manán Vila Atauru 1-0 foin lalais ne’e liuhusi Silvero Garcia nia golu, enkuantu Ponta Leste presiza pontu hafoin empata iha jogu ikus.
Jogu entre Ponta Leste ho AD Santo António sei hahú aban, tersa-feira, tuku 16:00 OTL, iha Estádiu Munisipál Dili. Billete fa’an ho folin $2 ba bankada jerál.
AS Ponta Leste
Iha fatin hanesan Treinadór Ponta Leste Rafael de Sousa hateten, maske iha jogu primeiru no segundu la rekolla pontu ho di’ak maibé sei esforu atu manán Santo António.
“Ami preparadu, iha jogu rua liu ne’e ami lakon ida, empata ida, maibé iha jogu tolu ne’e ami esforsu atu manán. Ami estuda ona oinsa atu halo mudansa ba formatu jogu,” treinadór Ponta Leste ne’e tenik.
Tuir nia, Santo António mai ho jogadór balun selesaun nasionál no eis treinadór Ponta Leste mak lidera, maibé ida-ne’e la sai sasukat atu hamonu Ponta Leste nia mentalidade.
“Sira, ami hatene mai ho jogadór ne’ebé di’ak. Balun selesaun nasionál maibé ida-ne’e la sai sasukat. Ha’u hatene, ami mós iha jogadór atu hasoru sira, tempu hotu minutu 90 iha kampu laran mak termina,” nia tdehan.
Jornalista : Hortêncio Sanchez
Editór : Cancio Ximenes
