DILI, 19 jullu 2024 (TATOLI)- Cruz Vermella Timor-Leste (CVTL), prepara ona voluntáriu ativu liu 500 hodi fó apoia servisu ba komunidade durante vizita Papa Francisco nian iha fulan-Setembru.
Prezidente CVTL, Madalena Hanjam hato’o asuntu ne’e iha Palásiu Governu, sesta ne’e, hafoin hasoru malu ho Primeiru-Ministru, Kay Rala Xanana Gusmão.
“Agora ami prepara ona voluntáriu ativu liu 500 husi CVTL rasik, depois sira sei bele apoia iha serbisu ba komunidade hanesan fó primeiru sokorru no nesesidade sira seluk,” Madalena Hanjam hateten.
voluntáriu nain-500 ne’e hili husi CVTL kuaze 2.000 ne’ebé iha esperiénsia no tuir ona formasaun oi-oin nu’udar ema profisionál.
” Daudaun, ba vizita Amu-Papa nian, ami tau atensaun liu oinsá maka bele kategoriza di’ak liután voluntáriu sira no atribui sira ba fatin sira ne’ebé presiza sira”, nia esplika.
Maske nune’e, to’o oras ne’e CVTL hein nafatin karta notifikasaun husi Governu atu ofisialmente hola parte iha prosesu vizita Papa Francisco nian iha futuru mai Dili.
Iha enkontru ho Primeiru-Ministru ne’e, Prezidente CVTL mós relata kona-ba atividade CVTL nian to’o agora ne’ebé foka liu ba formasaun primeiru sokorru, fornese bee-moos ba komunidade remota, fornese saneamentu públiku no programa nutrisaun.
“Tanba oras ne’e daudaun laiha fundu emerjénsia, ami foku ba dezenvolve área remota sira. PM kontente tebes ho ami nia prestasaun. Agora ami iha proposta 400 husi komunidade atu fornese bee moos no projetu 140 mak remata ona,” subliña Prezidente CVTL ne’e.
Biban ne’e, nia husu husu ba Xefe Governu atu haree fila-fali apoiu orsamentu ba CVTL hodi bele kontinua servisu iha komunidade nia le’et, liu-liu kompleta projetu bee-moos hamutuk 160 iha área remota.
Jornalista: Hortencio Sanchez
Editór : Florencio Miranda Ximenes
