BOBONARU, 17 Juñu 2026 (TATOLI)-Eskola Bázika Filiál (EBF) Roetete, iha suku Manapa, postu administrativu Kailaku, munisípiu Bobonaru, enfrenta problema falta profesór atu hala’o prosesu ensinu no aprendisazen ba estudante sira.
Profesora EBF Roetete, Marcelina de Sena Martins, hateten katak falta profesór obrigatóriu duni eskola nia jerénsia atu organiza prosesu aprendizajen liuhusi sistema hanorin multi-klase, ne’ebé kombina estudante sira husi klase primeiru no segundu anu iha saladeaula ida de’it.
“Ami nia problema mak menus profesór. Iha ne’e ami na’in-haat de’it, eskola to’o kintu anu, sira primeiru anu ho segundu ami tama iha fatin ida de’it, tanba matéria sei liga ba malu. Kuartu aho kintu anu mak sala ketak, ne’e mak presiza tan mestri rua para tinan ne’e ami tahan sestu anu iha ne’e, tanba sestu anu sira agora bá eskola fali iha Gelokaer, Ritabou, Raifun no Samutaben no dook los”, nia informa ba jornalista sira, ohin.
Aleinde problema kona-ba falta manorin, EBF Roetete mós enfrenta problema kona-ba falta matéria didátika atu ajuda profesór no estudante sira alkansa ensinu-aprendijazen.
“Ami uza manuál de’it. Pur ezemplu uza fatuk-oan, ai-oan, no ai-tahan sira mak hodi hanorin labarik sira, tanba matéria didátika sira uluk Governu fó ne’e laiha no aat hotu ona”, nia dehan.
Iha sorin seluk, Eugénia Santos reprezentante inan-aman estudante sira husu ba Ministériu Edukasaun atu tau atensaun ba problema referida hodi solusiona iha tempu tuirmai.
Notísia relevante: Projetu Konstrusaun eskola EBF Roetete atrazadu
“Eskola iha ne’e falta profesór, depois to’o de’it kintu anu. Sestu anu bá eskola iha fatin dook, kada vez sira ho idade ne’ebé ki’ik ne’e lakohi, sira balun la bá eskola. Ami husu dehan tans la ba esákola, sira dehan ami hela ho ema la toman, tanba sei ki’ik”, nia relata.
Tuir dadus tinan letivu 2026, EBF Roetete akumula estudante hamutuk na’in- 95 kompostu husi mane 58 no feto 37.
Notísia relevante: ME sei rezolve problema menus profesór iha eskola FINANTIL inklui eskola seluk
Jornalista: Sergio da Cruz
Editora: Maria Auxiliadora
