DILI, 07 Janeiru 2026 (TATOLI)—Diretór Nasionál Rekursu Umanu Ministériu Edukasaun (ME), João Amaral informa ME sei rezolve problema menus profesór iha Eskola Sekundáriu Jerál Fitun Naroman Timor Lorosa’e (FINANTIL) no eskola sira seluk, tanba ida-ne’e ME sei koloka bolsa kandidatu ba iha-ne’ebá.
“Molok ita atu halo xamada no kolokasaun ba profesór, primeiru ita iha uluk kuadru pesoál, depoiz ita mós sei identifika uluk eskola sira-ne’e nia nesesidade, hafoin ita halo kolokasaun,” nia dehan ba jornalista sira iha nia kna’ar fatin, Vila-Verde, Kuarta ne’e.
Nia subliña ligadu ho problema menus profesór ba matéria tolu iha FINANTIL, ministériu sei servisu hamutuk ho diresaun ensinu sira hodi halo kolokasaun.
Notísia relevante: ESJ FINANTIL laiha profesór portugés, tetun no desportu
“Ida-ne’e orsida ami sei servisu nafatin ho diresaun ensinu sira, nune’e ita bele koloka nafatin profesór ba eskola sira-ne’ebé menus profesor,” nia hateten.
Lembra fali katak antes ne’e Diretór Ensinu Sekundáriu Jerál FINANTIL, Aniceto Berlelo hateten profesór ne’ebé atu hanorin matéria portugés, tetun no desportu laiha.
“Ita iha profesór 78 maibé ida-ne’e seidauk to’o, tanba iha matéria balun profesór laiha. Ezemplu, língua portugés, tetun no desportu, ida-ne’e ita-nia profesór seidauk iha,” nia dehan ba jornalista sira iha nia kna’ar fatin, Aimutin, foin lalais ne’e.
Diretór ne’e mós lamenta ho Ministériu Edukasaun, tanba halo tiha kolokasaun ba profesór na’in-18 husi eskola FINANTIL bá eslola sira seluk.
“Kolokasaun ida-ne’e ha’u mós ladún hatene, tanba la mai husu informasaun iha eskola, tanba iha-ne’e profesór 18 mak Ministériu Edukasaun koloka fali bá eskola seluk, depoiz sé mak atu hanorin iha nia fatin,” nia kestiona.
Jornalista: Osória Marques
Editór: Xisto Freitas da Piedade
