DILI, 19 jullu 2024 (TATOLI)—Reprezentante povu iha uma fukun Parlamentu Nasionál (PN) liuhusi Deputadu CNRT, José Virgílio, husu Ministériu Obra Públika (MOP) no Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P) atu tau atensaun ba infraestrutura sira-ne’ebé hetan estragu husi inundasaun iha tinan kotuk, maibé to’o agora seidauk iha intervensaun ruma.
Nia dehan, iha fulan hirak nia laran observa fatin sira-ne’ebé akontese inundasaun iha tinan kotuk hanesan iha mota inklui iha Dili kontinua seidauk iha intervensaun ruma.
“Ezemplu hanesan iha parte Kuluhun no mota Becora iha merkadu nian, ita haree fatin ne’e kuaze estragu besik merkadu ne’e, nune’e MOP presiza tau atensaun ba ida-ne’e,” nia levanta iha uma fukun Parlamentu Nasionál.
Nia dehan, karik MOP tau ona obra sira-ne’e iha konkursu públiku entaun IGEADE, I.P presiza ba atende lalais.
Iha munisípiu, nia levanta asuntu estrada iha Uma-Wain Kra’ik-Bekarin iha Viqueque, inklui ponte ida kotu iha Lacluta to’o agora seidauk hadi’a.
Tan ne’e, nia hateten, IGEADE, I.P presiza halo atendimentu emerjénsia ho lalais inklui estrada rurál liga ba suku no aldeia sira.
“Hadi’a tanba populasaun sira iha ne’eba ejize, hodi sira bele lori sira-nia produtu lokál hanesan modo, fehuk, ai-farina no seluk tan ba faan iha merkadu,” nia dehan.
Enkuantu, antes ne’e mós, deputadu barak husi bankada Governu no opozisaun liuhusi reuniaun plenária sempre levanta preokupasaun infraestutura bázika hodi kontinua husu parte ezekutivu atu tau atensaun.
Jornalista : Nelson de Sousa
Editór : Cancio Ximenes
