VIQUEQUE, 28 agustu 2024 (TATOLI)- Bee Timor Leste, Empreza Públika (BTL,E.P) hamutuk ho Autoridade Postu Administrativu Uatucarabau, munisípiu Viqueque lansa projetu sistema bee-moos ba komunidade Uatcarbau hamutuk 985 ho total populasaun 1.5.910 no sei distribui ba instituisaun sira hanesan postu saúde, eskola, merkadu no igreja. .
Iha serimónia lansamentu ne’e, Vise-Prezidente Komisaun Ezekutiva BTL, E.P ba asuntu boa Governasaun no Fortalesimentu Institusionál, Elizabeth Amaral, hateten, projetu dada bee-moos ba komunidade postu Uatucarbau ne’e implementa tanba hetan apoia husi veteranu no autoridade sira tulun.
“Husi ita-boot sira-nia apoia maka ohin loron ita hakat ba faze lansamentu ida-ne’e. Iha oportunidade ida-ne’e ha’u husu nafatin autoridade sira-nia apoiu, nune’e projetu ne’e finaliza tuir nian duransaun tinan ida. Se karik mosu problema sosiál ruma kanu kona uma-ruma, ha’u husu nafatin autoridade sira-nia apoia nafatin ami (BTL,E.P) no empreza hodi rezolve problema sosiál sira”, Elizabeth Amaral, hateten ba Agência Tatoli, iha salaun postu Administrativu Uatucarbau, tersa (27/08).
Husu ba komunidade Postu Cartucarbau kontinua tau matan ba rekursu bee-matan Uaibati, kuandu bee-matan ne’e maran labele lori bee ba komunidade sira.
“Maske Estadu tau orsamentu hodi dada bee-moos ba komunidade, kuandu maran ita la konsege rezolve problema bee-moos. Nune’e mós bee-moos sai preokupasaun ba ema hotu-hotu no bee maka sai sentru ba ita moris. Tanba ne’e, komunidade tenke konserva nafatin ita-nia bee-matan”, nia afirma.
Iha fatin hanesan, Administrativu Postu Uatucarbau, Analeto D. Sarmento, agradese BTL,E.P tanba lansa ona projetu dada bee-moos ba komunidade sira-ne’ebé durante ne’e enfrenta ba bee-moos.
“Projetu bee-moos ne’e sei beifisia ba suku neen no aldeia 30 ba abitante ne’ebé hela iha vila. Nune’e mós ami husu empreza implementadór tenke garante kulidade”, nia afirma
Kona-ba implementasaun projetu sistema bee-moos ne’e enjinériu empreza Helfia Unip LDA, Juvinal da Silva Pinto, afirma, lansamentu ne’e empreza hahú distribui materiál kontrusaun ba fatin konstrusaun dada bee-moos nian tanba empreza hakarak asellera servisu.
“Atu garante kualidade servisu ami bazeia ba rezultadu teste materiál konstrusaun ne’ebé hala’o ona iha laboratóriun husi Ministériu Obras Públika (MOP). Nune’e ami sei uza materiál sira-ne’ebé hetan texte iha laboratóriu tanba ami mós hakarak garante kualidade”, nia kompromete.
Nia dehan, projetu sistema bee-moos ba postu Uatucarbau sei involve traballadór Uatucarbau oan na’in-50 resin hodi apoiu servisu kanalizasaun no konstrusaun sira.
Entretantu kustu projetu sistema bee-moos totál hamutuk $1.334,472.12 ne’ebé konstrui husi empreza Helfia Unip LDA durasaun servisu tinan ida. Projetu referida benifisia ba uma-kain 985 no totál populasaun 1.5.910 no sei distribui ba instituisaun sira hanesan postu saúde, eskola, merkadu no igreja.
Partisipa iha serimónia lansamentu projetu bee-moos ne’e mak hanesan autoridade lokál sira, Polísia Eskuadra Uatucarbau, koordenadór BTL,E.P munisípiu Viqueque no komunidade postu Uatucarbau.
Jornalista : Vitorino Lopes da Costa
Editór : Florencio Miranda Ximenes
