DILI, 06 setembru 2024 (TATOLI)–Empreza Alacatel Submarine Networks (ASN) konklui ona instalasaun repetidór hitu branch unit, ne’ebé hanesan fasilidade husi fibra ótika kabu submarinu.
“Bazeia ba informasaun husi ha’u-nia ekipa téknika sira ne’ebé akompaña serbisu iha terrenu, relata katak iha loron 04 setembru 2024 konklui hodi koneta ona ba infraestrutura iha Austrália,” Diretór Nasionál Infraestrutura no Komunikasaun iha Ministériu Transporte no Komunikasaun (MTK), Ambrosio Amaral, informa ba Agência Tatoli, via telefónika, sesta ne’e.
Hafoin ida-ne’e, prosesu tuir maai sei koko instalasaun kabu submarinu ho durasaun fulan-tolu no bainhira konklui faze ne’e empreza sei haree hotu mak hakat ba faze teste nian.
Bazeia ba estudu ne’ebé halo, repetidór ida ba repetidór seluk mínimu ho distánsia kilómetru 100, maibé depende ba tasi nia kle’an, maibé husi kontratu kabu dada husi Timor-Leste to’o Darwin ho destinasaun iha VOCOS Austrália hamutuk kilómetru 650.
Notísia relevante : ASN instala ona repetidór fibra ótika lima
Repetidór hitu branch unit ida ne’ebé tau eroi no eroina sira nia naran mak hanesan repetidór númeru R4101 eroina Saudoza Maria Udu Bele ‘Maria Tapó’, repetidór númeru R4102 eroina Saudoza Rosa Bonaparte Soares ‘Muki, retodór númeru R4103 eroina Saudoza Dulce Maria da Cruz ‘We-We’, repetidór númeru R4104 Saudozu Fernando de Araújo ‘Lasama’, Branch Unit saudozu Agustinho do Espírito Santo, repitidór númeru R4301 saudozu José da Silva, repetidór númetu R4302 saudozu Venâncio Ramos Amaral Ferraz, repetidór númeru R4303 saudozu Dinis Carvalho da Silva ‘Nelo Kadomi Timor’.
Antes ne’e, Governu realiza ona serimónia boot rua hanesan asinatura ba repetidór hitu branch unit ida ne’ebé tau saudozu no martír sira-nia naran no entrega ‘Golden Buoy’ inklui instalasaun dahuluk ba kabu submarinu fibra ótika ka Timor-Leste South Submarine Cable (TLSSC) iha estasaun aterrajen ka cable leading station ne’ebé sei sai pontu koneksaun kabu husi Bebonuk-Dili bá Darwin.
Jornalista : Arminda Fonseca
Editora : Julia Chatarina
