DILI, 26 agostu 2024 (TATOLI) – Diretór Nasionál Infraestrutura no Komunikasaun iha Ministériu Transporte no Komunikasaun (MTK), Ambrosio Amaral, hateten Empreza Alcatel Submarine Networks (ASN) konsege instala ona repetidór fibra ótika lima, hafoin lansamentu ofisiál prosesu instalasaun Kabel Fibra Ótika Submarinu Sul Timor-Leste (TLSSC) dezde fulan Juñu liubá.
“Agora daudauk ita atinje ona repetidór lima no tuir tarjetu, iha fim agostu bele kompleta ona no ita sei iha loron ualu antes fulan ida-ne’e remata, maibé konserteza prosesu iha tasi depende ba tempu maibé ne’e mak ita-nia tarjetu duni”, Ambrosio Amaral relata ba TATOLI iha nia kna’ar fatin MTK Caicoli.
Nia rekorda, prosesu instalasaun ne’e hala’o ona, hahú husi 24 Juñu 2024, repetidór sira ne’ebé monta ona, hahú husi repetidór númeru R4101 Maria Udu Bele, Maria Tapo repetidór númeru R4102, Rosa Bonaparte repetidór númeru R4103, Dulce Maria da Cruz We-We repetidór númeru R4104, Fernando de Araújo La-Sama ba repetidór númeru R4105 Agustinho do Espírito Santo.
“Prosesu instalasaun ne’e hala’o tuir akordu ne’ebé iha, entre Governu ho empreza, iha ne’ebé to’o fim agostu 2024, instalasaun ne’e tenke remata atu kabel ne’e bele halo teste ba fulan tolu, hahú husi setembru to’o novembru 2024”, nia informa.
Governu antes ne’e, asina ona kontratu ho Empreza Alcatel Submarine Network (ASN) ba projetu Timor-Leste South Submarine Cable (TL-SSC) entre Dili, Darwin no Port Hedland, Austrália ho valór millaun $38,6.
“Ami-nia koordenasaun ho ekipa iha ne’eba la’o nafatin no ami haree katak servisu ne’ebé hala’o iha área tasi sira hanesan ne’e dezafiu ba ekipa iha ne’eba, maibé to’o agora di’ak hela”, nia hateten.
Bazeia ba estudu ne’ebé hala’o, molok repetidór ida ba repetidór seluk, maizumenus kilómetru 100, maibé ne’e depende ba tasi nia kle’an. Tuir kontratu, kabel husi Timor-Leste ba Darwin ka nia destinu iha VOCOS Austrália mak 650 kilometru.
Repetidór sira hetan ona naran hanesan Maria Udu Bele ‘Maria Tapó’, Rosa Bonaparte Soares ‘Muki’, Dulce Maria da Cruz ‘We-We’, Fernando de Araújo ‘Lasama’, Agustinho do Espirito Santo, José da Silva, Venâncio Ramos Amaral Ferraz no Dinis Carvalho da Silva ‘Nelo Kadomi Timor.
Notísia relevante : PM asina plaka dedikasaun naran eroi ba repetidór fibra ótika
Jornalista : Felicidade Ximenes
Editór : Zezito Silva
