DILI, 25 setembru 2024 (TATOLI) – Asidente ahi han bus Babadok Express iha Kefa, Indonézia, Asosiasaun Emprezariál Feto Timor-Leste (AEMTL), informa katak iha ona prosesu investigasaun.
“Ami foti desizaun ida-ne’e atu rezolve asuntu asidente tuir prosesu investigasaun ne’ebé kle’an hodi hatene los kauza husi asidente ida-ne’e, depois rezolve asuntu sira ne’ebé mak lakon no oinsá atu rekupera fali lakon ne’e no oinsá ba oin atu kontinua investe negósiu ida ne’e,” Prezidente AEMTL, Hergui Luina Fernandes, informa, ba jornalista sira liuhusi konferénsia imprensa iha AEMTL, Acait-Dili, ohin.
Prezidente ne’e dehan, Bus Babadok ne’ebé mak iha ne’e rejista hanesan bus 01 ne’ebé horseik halao nia viajen husi kupang mai Dili to’o iha desa Oinmit, hetan asidente ahi han iha oras 12:30 meiu-dia.
“Asidente ida-ne’e asidente derrepente bainhira kondutór sira viajen hela, horon iis, tenta atu haree,maibé ahi boot ona. Entaun, sira tenta salva pasajeiru na’in sia; maioria sidadaun Indonezia no timoroan na’in haat. Ami deklara katak ami lakon bus Babadok Express ida-ne’ebé ahi han ona, entaun kona ba kauza husi asidente ne’e daudaun iha hela prosesu investigasaun nia laran,” nia esplika.
Autoridade AEMTL ne’e afirma, bus ne’e rasik halo manutensaun regular tanba iha semana kotuk bus ne’e rasik troka ekipamentu sira ne’ebé mak to’o husi nasaun Xina mai.
“Bus ida-ne’e nia kilometrazen ki’ik maibé ahi han ona ami entrega ba parte invetigasaun hodi hatene loloos kauza husi asidente ida-ne’e,” nia relata.
Notísia relevante:Ahi-han Babadok Express iha Kefa
Jornalista : Felicidade Ximenes
Editór: Rafael Ximenes de A. Belo
