DILI, 08 Jullu 2026 (TATOLI)-Marcelino da Costa Belo, profesór husi Eskola Sekundária Tékniku Vokasionál (ESTV) Bekora, Dili, hato’o preokupasaun ba Komisaun G iha Parlamentu Nasionál, ne’ebé Trata Asuntu Edukasaun, Juventude, Desportu no Kultura ho Sidadania, kona-ba Ministériu Edukasaun (ME) ne’ebé to’o agora seidauk realiza pagamentu ba mudansa eskalaun no grau ba manorin sira.
Tanba ne’e, nia hakat bá Komisaun G hodi konfirma sira-nia karta ne’ebé antes ne’e hato’o ona ligadu ho kestaun referida. Tanba Komisaun iha papél halo fiskalizasaun iha área edukasaun liuliu ba profesór sira ne’ebé to’o agora vítima hela ba mudansa eskalaun no grau.
“Ohin, ami hatama tan karta pedidu audiénsia ho Komisaun, maibé iha resposta katak,durante fulan rua Komisaun laiha tempu [tanba besik tama ba resesu], nune’e iha Setembru mak bele mai konfirma filafali”, nia hateten hafoin entrega karta pedidu audiénsia hamutuk ho maluk profesór sira iha Parlamentu, ohin.
Manorin ne’e dehan bazeia ba Konstituisaun artigu 19 alínea 2 hateten katak Governu sei halo buat hotu atu trata edukasaun, saúde no formasaun profisionál ba juventude sira. Maibé, ko’alia kona-ba edukasaun profesór sira-nia vida tenke trata ho di’ak mós.
Bazeia ba Dekretu-lei númeru 31/2023, loron 31 Maiu, iha oitavu Governu aprova ona diploma ne’e no Ministériu Edukasaun implementa ona artigu 11 ba progresaun ida espesiál nian, kargu xefia, rekrutamentu ba iha bolsa kandidatu.
“Maibé, úniku ida de’it mak até agora Ministériu Edukasaun seidaiuk paga mak mudansa eskalaun no grau. Kada tinan rua ami iha mudansa eskalaun, entaun ami-nia grau ne’e sa’e automátika”, nia dehan.
Tanba ne’e, bá ona halo konfirmasaun ho Komisaun Funsaun Públika (KFP) katak sira-nia eskalaun sa’e automátika, maibé husi KFP hato’o katak husi ME mak la halo proposta mai hodi halo pagamentu ba mudansa eskalaun no grau.
Nia hateten, antes ne’e hato’o ona karta pedidu ba ME no órgaun soberania sira seluk. “Tanba ami hatene laiha profesór mak laiha Prezidente Repúblika, Primeiru-Ministru, no laiha dezenvolvimentu rekursu umanu iha nasaun ida sei labele akontese”, katak.
Deputadu husi Bankada Kmanek Haburas Unidade Nasionál Timoroan (KHUNTO), António Verdial de Sousa, hateten ezijénsia husi manorin sira presiza hetan atensaun.
Jornalista: Nelson de Sousa
Editora: Maria Auxiliadora
