DILI, 01 Jullu 2026 (TATOLI) – Ministru Negósiu Estranjeiru no Kooperasaun, Bendito dos Santos Freitas konsidera vizita ofisiál Primeiru Ministru no Ministru Finansa Singapura, Lawrence Wong mai Timor-Leste hanesan oportunidade importante atu hametin kooperasaun bilaterál entre nasaun rua.
Ministru Bendito hatoo deklarasaun ne’e hafoin enkontru Konsellu Ministru, ohin, iha ne’ebé governante sira diskuti kona-ba programa vizita ofisiál Xefe Governu Singapura mai Timor-Leste husi loron 2 no 3 fulan Jullu.
Durante sorumutu, aprezentasaun kona-ba vizita PM Wong hatoo hosi Vise Ministra Negósiu Estranjeiru no Kooperasaun, Jesuína Maria Ferreira Gomes.
Ko’alia ba jornalista sira iha Palásiu Governu, Ministru Bendito hateten katak vizita ne’e hanesan kontinuasaun esforsu rai-rua nian atu haburas relasaun polítika, diplomátika no kooperasaun ba dezenvolvimentu.
“Nia vizita importante tebes atu hametin no reforsa tan relasaun bilaterál entre Timor-Leste no Singapura. Hanesan ita hotu hatene, iha tinan 2025, Primeiru Ministru Kay Rala Xanana Gusmão hala’o vizita ofisiál ba Singapura no entrega karta konvite ofisiál ba Primeiru Ministru Lawrence Wong atu halo vizita mai Timor-Leste,” dehan Bendito. “Ita fiar katak vizita ne’e bele iha solusaun barak liu tan ba ita-nia kooperasaun bilaterál entre nasaun rua ne’e.”
Tuir programa ne’ebé Governu aprova, durante vizita ofisiál ne’e, Primeiru Ministru Lawrence Wong sei hasoru malu ho Prezidente Repúblika, José Ramos-Horta no Primeiru Ministru Kay Rala Xanana Gusmão.
Entretantu, Prezidente Repúblika mós sei fó Orden Timor-Leste ba Primeiru Ministru Lawrence Wong hodi rekoñese ninia kontribuisaun ba hametin amizade no kooperasaun Timor-Leste no Singapura.
Jornalista: Alexandra da Costa
Editór: Filomeno Martins
