DILI, 01 Jullu 2026 (TATOLI) – Kapitaun Kylian Mbappé brilla hodi asegura golu rua (doblete) no lori Fransa manán konvinsente 3-0 kontra Suésia iha jornada 32 Kopa Mundiál 2026. Vitória ne’e lori Les Bleus avansa ba oitavu finál (16 avos final) hodi hasoru Paraguai, ne’ebé antes ne’e elimina tiha Alemaña.
Jogu ne’e hala’o iha Estádiu MetLife, New York/New Jersey, Estadus Unidus Amérika (EUA), kuarta-madrugada oras Timor-Leste.
Primeira parte: Suésia hahú forte, Fransa kontrola jogu
Suésia tama ho agresividade aas. Iha de’it minutu ida (1), kombinasaun entre Viktor Gyökeres ho Alexander Isak ramata ho xute forte ba alvu, maibé guarda-rede Fransa, Mike Maignan, salva ho seguru.
Hafoin presaun ne’e, Fransa hahú domina fali futeból. Mbappé ho Lucas Digne tenta suta husi li’ur área penalidade, maibé guarda-rede Suésia, Oliver Zetterström, hatudu serbisu di’ak hodi defeza bola hotu.
Oportunidade di’ak liu Suésia nian akontese hafoin pauza ba hemu bee (hydration break) dahuluk. Xute-livre hetan Isak iha área laran, maibé nia finalizasaun fraku no Maignan kapta ho kalma.
Fransa responde fali ho fuzilaun atake. Minutu 35, pasa hosi Mbappé ba Adrien Rabiot kria perigu, maibé Zetterström blokeia nafatin. Iha minutu 44, Jules Koundé fó pasa kruzadu ba Mbappé iha área laran, maibé nia xute kona de’it poste.
Golu ne’ebé hein barak mai duni antes intervalu. Iha minutu 45, kombinasaun rítmiku husi Michael Olise ho Ousmane Dembélé remata ho kruzamentu rasteiru. Mbappé ne’ebé livre husi marka-an, suta kedas ba poste dook hodi nune’e muda plakar ba 1-0.
Segunda Parte: Kontra-atake mortál
Fransa hatudu intensidade ne’ebé aas liután iha segunda parte. Iha minutu 53, Aurélien Tchouaméni foti bola iha meiu-kampu no lansa kontra-atake lalais. Bola to’o ba Olise, ne’ebé lori hodi pasa ba Bradley Barcola, no avansadu ne’e suta maka’as hodi hatama golu daruak (2-0).
Olise kontinua sai ameasa boot ba defeza sueku. Avansadu ne’e kria oportunidade husi xute ain-karuk dala rua husi li’ur área penalidade, maibé Zetterström halo salva ho kbiit tomak.
Iha minutu 74, Mbappé taka duni odamatan ba Suésia. Kruzamentu hosi liña liman-karuk hetan fali nia iha área laran. Ho tátika lalais, nia halai hakat liuhosi deféza no suta ho ain-karuk loos ba rede laran. Plakar sa’e ba 3-0 no sai doblete ba estrela Real Madrid nian.
Barcola besik tan atu aumenta golu iha minutu 80, maibé Zetterström blokeia fali. Iha minutu ikus sira, Gyökeres koko hodi suta ba Maignan, no hosi parte Fransa, Désiré Doué fó kruzamentu ba Jean-Philippe Mateta, maibé nia kabeza-bola guarda-rede sueku salva fali.
Aliñasaun Jogadór
- Fransa [4-2-3-1]: Maignan; Koundé [Gusto 75’], Upamecano, Saliba, Digne [Theo Hernández 78’]; Tchouaméni, Rabiot; Dembélé [Doué 75’], Olise [Mateta 85’], Barcola; Mbappé [Cherki 85’].
Treinadór: Didier Deschamps.
- Suésia [4-4-2]: Zetterström; Lagerbielke, Lindelöf, Gudmundsson; Svensson [Svanberg 82’], Ayari [Nygren 82’], Bergvall [Zeneli 66’], Stroud [Ali 66’]; Elanga, Isak; Gyökeres.
Treinadór: Jon Dahl Tomasson.
Oitavu Finál
Ho rezultadu ne’e, Fransa sei hasoru Paraguai iha faze tuirmai. Dezafiu boot ida hein hela Les Bleus, tanba Paraguai mai ho morál ne’ebé aas tebes hafoin suta sai tiha Alemaña husi kompetisaun ne’e.
Jornalista: Hortêncio Sanchez
Editór: Rafael Ximenes de A. Belo
