DILI, 12 dezembru 2024 (TATOLI)–Governu liuhusi reuniaun Konsellu Ministru (KM) aprova ona kooperasaun Timor-Leste ho Ismaili Imamat (TL-Ismaili Imamat) iha área dezenvolvimentu sosiál no ekonómiku.
“Ismaili Imamat no ninia instituisaun dependente sira, hanesan Rede Aga Khan ba dezenvolvimentu, iha misaun atu promove kualidade moris ne’ebé di’ak liu, la distinge fiar, orijen ka jéneru, promove inisiativa iha área sira hanesan edukasaun, saúde, kultura, dezenvolvimentu rurál, habitat umanu, resposta ba krize, mikrofinansiamentu, dezenvolvimentu ekonómiku no hametin instituisaun sosiedade sivíl nian,” referidu nota ne’ebé Agência Tatoli asesu, kinta ne’e.
Notísia relevante : PR Horta ho líder Parlamentár Portugal diskute relasaun billaterál no ekonómia
Antes ne’e, Konsellu Ministru aprova ona projetu rezolusaun Governu nian, ne’ebé aprezenta husi Ministru Negósiu Estranjeiru no Kooperasaun, kona-ba Protokolu Kooperasaun entre Governu Repúblika Demokrátika Timor-Leste no Ismaili Imamat, ne’ebé asina iha Lisboa iha loron 17 outubru 2024.
Protokolu ida-ne’e ho objetivu atu estabelese lasu kooperasaun no promove troka informasaun no konsulta entre parte sira, ho hanoin atu promove valór komún sira iha fórum internasionál no rejionál, hanesan dignidade umana, dezenvolvimentu sosiál no ekonómiku, diálogu interrelijiozu no rezolusaun konflitu ho dalan pasífika, ne’ebé kontribui ba promosaun justisa no dame.
Jornalista : Osória Marques
Editora : Julia Chatarina
