OEKUSI, 14 Fevereiru 2025 (TATOLI)—Polísia Nasionál Timor-Leste (PNTL) liuhusi Unidade Patrullamentu Fronteira (UPF) hamutuk ho Satuan Tugas Pengamanan Perbatasan (Satgas-Pamtas) Tentara Nasional Indonensia Angkatan Darat (TNI-AD), sesta ne’e, hala’o patrullamentu koordenasaun.
Notísia relevante:FOTO ATUÁL: UPF ho Satgas-Pamtas hala’o patrullamentu koordenasaun iha fronteira Naktuka
Komandante UPF, Superintendente Polísia, Euclides Belo, hateten objetivu husi patrallamentu konjunta ne’e atu observa pilár sira iha liña fronteira Naktuka, suku Bene-Ufe, sub-rejiaun Nítibe, Rejiaun Administrativa Espesiál Oekusi Ambenu (RAEOA), atu labele hetan estragu husi dezastre naturál.
“Patrullamentu koordenasaun ho TNI Satgas, atu garante seguransa iha liña fronteira espesialmente husi postu Oépoli ho postu UPF Citrana, tanba daudaun ne’e tempu udan mota tún, anin maka’as, keta pilár sira hetan estragu karik, entaun iha dentru patrullamentu ne’ebé ami hala’o ho TNI hakat mota bá iha Naktuka atu haree no observa pilár sira iha liña fronteira, tanba pilár sira-ne’e mak determina ita-nia fronteira entre nasaun rua nian,” Euclides Belo ba jornalista sira iha Naktuka.
Iha patrullamentu koordenasaun ne’e, nia haktuir, konsege observa pilár hamutuk 100 nu’udár fronteira Naktuka ho Oépoli nian. Pilár sira-ne’e garantidu sei laiha estragu husi komunidade tanba ho pilár sira-ne’e, sai hanesan pontu referénsia ba nasaun rua nian atu halo komunikasaun no garante seguransa nasaun rua nian.
Nia informa, iha ámbitu patrullamentu konjunta ne’e, hasoru-malu ho komunidade husi Naktuka no Oépoli, ne’ebé entusiázmu tebes hodi koopera ho autoridade seguransa liuliu UPF ho TNI.
“Ami haree komunidade kontinua hala’o atividade toos no natar. Ne’ebé, ami hasoru-malu ne’e iha objetivu prinsipál nune’e bele integra ami-nia pensamentu hanesan ajente seguransa nasaun nian liuliu iha liña fronteira. Tan ne’e, ho koordenasaun ne’e ita foti pontu pozitivu atu garante seguransa liña fronteira,” nia afirma.
Euclides salienta katak kona-ba kna’ar UPF garante de’it seguransa iha liña fronteira, más kestaun delimitasaun fronteira ne’ebé seidauk rezolvida, kabe bá kompeténsia ekipa téknika husi Ministériu Negósiu Estranjeiru no Koperasaun (MNEK) nasaun rua nian.
“Ami limite ami-nia komentáriu sira liga ba asuntu fronteira nian. Nu’udár autoridade seguransa ami foku atu kria relasaun hodi garante seguransa ba nasaun rua, nune’e komunidade moris ho kontente no seguru,” nia dehan.
Notísia relevante:UPF- Satgas TNI organiza patrulla konjunta iha fronteira Haumeni Ana Pássabe
Entretantu, Brigadeiru Jenerál TNI Kupang, João Xavier Barreto Nunes, hato’o agradesementu ba Satgas-Pamtas ho UPF tanba hala’o ona misaun nu’udár seguransa iha liña fronteira hodi garante seguransa.
“Ha’u agradese ba forsa rua ne’ebé durante ne’e hakna’ar atu asegura liña fronteira sira. NTT fronteira direta ho Timor-Leste liuliu Oekusi no lian ida de’it Baikenu. Tan ne’e, ha’u hanoin problema Naktuka ita entrega ba polítiku sira mak rezolve, maibé nu’udár seguransa, prioridade mak ne’e, hein fronteira no enkoraja komunidade halo natar no toos,” nia tenik.
Notísia relevante:UPF no TNI realiza border meeting haforsa seguransa iha liña fronteira
Jornalista: Abílio Elo Nini
Editór: Xisto Freitas da Piedade
