DILI, 19 Fevereiru 2025 (TATOLI)-Embaixadór Timor-Leste iha Xina, Loro Horta, hasoru Sekretáriu Estadu Ensinu Sekundária Jerál no Tékniku vokasional, Domingos Lopes Lemos, hodi diskute bolsa estudu ne’ebé Governu Xina atu oferese ba Timoroan sira, liuliu Ensinu Sekundáriu Tékniku Vokasionál (ESTV).
“Ohin ita hasoru malu halo diskusaun uituan kona-ba andamentu ka prosesu ESTV liuliu iha ita-nia rai-laran no ita mós hetan informasaun husi embaixadór ba bolsa estudu ne’ebé mak Governu Xina atu oferese ba Timor. Ho situasaun sira-ne’e mak ita tur hamutuk ko’alia ho embaixadór, nune’e embaixadór halo kooperasaun ho Governu Xina hodi estabelese bolsu estudu ba área sira ne’ebé importante iha ita-nia rai ne’e”, dehan Domingos Lopes, iha salaun ME Villa-Verde, kuarta ne’e.
Nia dehan, bolsa estudu ne’ebé Governu Xina atu oferese ba Timoroan sira, liuliu iha ensinu sekundáriu tékniku vokasional ne’e, espera bele fó vantajen ne’ebé di’ak, nune’e bele kontinua nafatin iha futuru.
“Tanba ita-nia rai ne’e presiza tékniku sira atu dezenvolve rai ida-ne’e. Ho ida-ne’e ita agradese ba embaixadór nia esforsu ne’ebé kolabora ho Governu Xina hodi bele fó bolsa estudu ba ita-nia estudante sira”, nia informa.
Embaixadór Timor-Leste iha Xina, Loro Horta, hatete bolsa estudu ne’ebé Governu Xina atu fó ba Timoroan sira iha ensinu sekundáriu tékniku vokasionál ne’e ba ema na’in-15.
“Kona-ba bolsa estudu sira ne’ebé atu oferese ba Timoroan sira-ne’e iha área agrikultura, peska no pekuaria. Kona-ba selesaun sira-ne’e sei selesiona husi ME no embaixada Xina no bolsu estudu ne’e sei fó iha tinan ida-ne’e”, nia dehan.
Nia hatutan, tanba durante ne’e Governu Xina oferese bolsa estudu ne’e ba nível lisensiatura de’it, ho nune’e ba tinan ida-ne’e sei fo fila fali ba nível ensinu sekundáriu tékniku vokasionál.
“Durante ne’e fó bolsa estudu ba nível lisensiatura de’it, entaun ita ko’alia ho sira hodi bele fó mós bolsa estudu ba iha ESTV sira, ne’e mak dadaun ne’e ita diskute hela”, tenik.
Notísia relevante: Xina oferese bolsa estudu ba estudante UNTL na’in 60
Jornalista : Osória Marques
Editora : Rita Almeida
