DILI, 11 Marsu 2025 (TATOLI)-Governasaun Urbana liuhusi União das Cidades Capitais de Língua Portuguesa (UCCLA) entrega edifísiu foun instalasaun ekipamentu Balkaun Úniku ba Autoridade Munisipál Dili, ne’ebé lokaliza iha arredór edifísiu Autoridade Munisipál, Dili.
Objetivu husi fatin Balkaun Úniku ne’e, atu halo atendimentu ba servisu administrasaun públiku nian, hanesan trata dokumentu komprovativu, Passaporte, Billete Identidade, karta rejistu kriminál nian. Bele ajuda loke tan espasu atu halo atendimentu públiku ho lais.
“Balkaun ida-ne’e atu halo atendimentu públiku hanesan ohin ha’u mensiona kona-ba dokumentu hanesan, pasaporte, Billete identiddade no rejistu kriminál, maibé la’ós edifísiu notariadu sentrál muda mai iha ne’e, maibé ne’e hanesan aumenta tan fasilidade hodi fó espasu ba atendimentu públiku”, Sekretáriu munisipál planeamentu investimentu no dezenvolvimentu integradu, Francisco dos Santos, ba Jornalista TATOLI iha edifísiu AMD, Dili, ohin.
Tanba, tuir Sekretáriu Francisco dos Santos, populasaun iha Munisípiu Dili ne’e kuantidade boot, entaun estabelese fatin ida-ne’e bele ajuda hodi fó espasu ba atendimentu públiku iha Dili ho lais no di’ak.
“Tanba ita hotuhotu hatene populasaun iha Munisípiu Dili lahanesan ho Munisípiu sira seluk, tanba kapitál nasaun, entaun, ho populasaun ida-ne’ebé maka boot presiza atendimentu ne’ebé lais, atu nune’e bele fó satisfasaun ba ita-nia komunidade sira”, nia dehan.
Aleinde ne’e sei halo instalasaun ba fasilidade ne’ebé iha no sei halo mós kooperasaun ho Ministériu Justisa hodi bele koloka funsionáriu hodi hala’o servisu.
“Fasilidade ne’ebé Governasaun Urbana sira prepara ho di’ak, nune bele, garante ba servisu ida-ne’e la’o ho di’ak, hein de’it husi Estatál halo kooperasaun ho Justisa atu koloka funsionáriu sira”, nia hatutan.
Entretantu, Balkaun ne’e hetan apoiu finanseiru husi Uniaun Europeia, implementasaun husi UCCLA no Câmara Municipal Lisboa no AMD, no sei jere husi Ministériu Administrasaun Estatál.
Kona-ba atividade atendimentu provizoriamente seidauk hala’o, tanba sei iha mós sesaun tuirmai hanesan instalasaun no halo inaugurasaun; sei hala’o iha tempu-badak nia laran.
Enkuantu iha termu entrega ne’e, hetan partisipasaun husi Governasaun Urbana sira, funsionáriu Autoridade Munisipál Dili, Delegasaun agrikultura no floresta, funsionáriu Ministériu Estatál, loloos iha mós partisipasaun husi Ministu Estatál maibé iha momentu ne’e la marka prezensa tanba okupadu.
Jornalista: Alexandra da Costa
Editór: Rafael Ximenes de A. Belo
