BAUKAU, 18 Abríl 2025 (TATOLI)—Selebrasaun sesta-feira santa refleta Jesus Kristu nia mate iha krús, refleta Maromak nia domin liuhusi Jesus Kristu oferese aan ba mate tanba ba ema-nia salan no loron atu adora krús santa.
”Selebrasaun sesta-feira santa nian atu ita hotu halo reflete Maromak nia domin boot ba ita, tanba normalmente iha ita-nia moris mak terus no susar. Entaun, ita tenke hanoin sala sira hotu atu hamoos klamar iha tempu kuarezma ida-ne’e,” Pe. João Boavida, SDB, hateten liuhusi nia omilia iha selebrasaun adorasaun krús iha igreja Parokuia São João Bosco, Laga, ohin.
Nia hateten, iha liturjia sesta-feira santa nian mak atu reflete Maromak nia domin boot ba ema, entaun buka dalan oioin atu dezafia sofrementu sira-ne’ebé mak iha.
Tanba saida mak Maromak ne’e permite, ema ida-nia dalan ne’e aat tebes maibé iha sesta-feira Santa ne’e, Maromak hakarak fó hanoin bna sarani sira, dala-balun iha sofrementu nia laran mak ema balun hanoin aat ba malu no lori lia-kro’at ba malu.
”Tanba ne’e, iha sesta-feira santa tenke reflete ida-idak nia salan. Tanba, husi ita-nia sala mak Jesus terus iha krús, entaun fó hanoin mai ita atu hamoos ita ida-idak nia klamar iha tempu kuarezma ida-ne’e,” nia hateten.
Entretantu, hafoin to’o iha selebraaun odorasaun krús ne’e, iha sesta-feira santa ne’e, sarani sira iha parokia Laga hala’o viasakra ba dalan kruz kalvariu nian ho entuziasmu tebes, hodi refleta Jesus nia terus no mate iha krús santa.
Jornalista : Felicidade Ximenes
Editór : Cancio Ximenes
