BAUKAU, 06 Maiu 2026 (TATOLI)—Autoridade Munisipál Baukau (AMB) konsidera konstrusaun kampu multifunsaun sei hasa’e talentu juventude Baukau-oan liuliu iha área desportu.
Prezidente Autoridade Munisipál (PAM) Baukau, Veneranda Eurico Lemos Martins, esplika importánsia kontrui infraestrutura desportu hanesan parte husi investementu ba juventude tanba munisípiu Baukau koñesidu nakonu ho talentu atleta liuliu iha futeból, voliball no basketball.
“Baukau iha área desportu maioria joven sira entusiazmu aas maibé durante ne’e laiha kampu entaun autoridade autoriza tinan-ne’e konstrui kampu fundu husi PNDS,” Veneranda Lemos hateten iha Salaun Apuramentu Administrasaun Munisipál Vila Nova, Kuarta ne’e.
Eis deputada ne’e relata AMB Baukau iha kompromisu ba área desportu nune’e liuhusi fundu Programa Nasionál Dezenvolvimentu Suku (PNDS) tinan-ne’e aloka ba kampu multifunsaun bazeia ba pedidu husi autoridade suku sira iha atividade regulár.
Notisia relevante: Autoridade suku sei konstrui kampu multifunsaun iha Osso-Huna
Veneranda solisita autoridade suku sira atu aselera obra hirak-ne’e ho kualidade nune’e bainhira ramata iha ona kondisaun ba juventude iha suku atu espresa talentu iha área desportu.
“Fulan-ne’e simultaniamente obra ne’e sei hahú hala’o iha suku sira,” Veneranda akresenta.
Entretantu, Kampu multifunsaun rasik bainhira konstrui sei utiliza ba modalidade desportu haat hanesan futeból, futsál, voliball no basketball iha-ne’ebé tinan-ne’e sei konstrui iha suku haat hanesan Osso-Huna, Buruma, Bualale no Uatuhako iha-ne’ebé kada kampu sei gastu orsamentu rihun $40-resin.
Jornalista: Natalino Belo
Editór: Xisto Freitas da Piedade
