VIKEKE, 15 Maiu 2025 (TATOLI)–Organizasaun Civil Society Education Parternership (CSEP, sigla englés), durante ne’e fasilita ona feto hamutuk na’in-19 asesu ba bolsa estudu iha Asian University for Women iha nasaun Banglades.
Ofisial Peskiza no Advokasia husi organizasaun Civil Society Education Parternership (CSEP, sigla englés), Feliciano Soares, esplika bolsa estudu ne’e fó períoridade ba feto no tenke hatene lian englés, hafoin asesu ba bolsa estudu husi universidade Banglades.
“Aggora daudaun ne’e, ita-nia estudante timor-oan na’in-(19) eskola iha Asian University for Women. Estudante sira-ne’e hahú asesu ba bolsa husi Asian University for Women Banglades tinan 2019, oras-ne’e ita-nia estudante sira sei kontinua aprende iha universidade,” Feliciano Soares hateten ba Agência TATOLI iha postu Vikeke Vila, ohin.
Feliciano dehan, prosesu rekrutamentu ba bolsa estudu husi universidade Banglades ne’e fó períoridade ba feto mak bele asesu ne’ebé bolsa ne’e loke kada tinan fó oportunidade ba timoroan na’in–10.
“Vaga bolsa ne’e ami fó-sai iha ami-nia pájina. Estudante sira interese aplika vaga bolsa estudu. Prosesu selesaun dokumentu kandidatu sira-ne’e universidade Banglades mak halo. Bainhira kandidatu sira liu selesaun dokumentu, foin mak universidade haruka fali estudante sira-nia naran ba ami. Prosesu teste eskríta universidade mak prepara, depois fó ba ami mak fó teste ba kandidatu sira, iha ami-nia edifísiu iha Timor bainhira teste eskrítika hotu. Teste intervista ba kandidatu sira. Maibé, prosesu teste entervista universidade mak halo entervista direta ho estudante sira-ne’ebé liuhusi zoom meting, kuandu liu ne’e sira bele ba eskola ona iha universidade Banglades,” nia esplika.
Kona-ba teste, nia dehan, ne’e teste ho meritu no laiha intervensaun ruma ne’ebé ba estudante sira-ne’ebé hakarak konkore ba bolsa ne’e tenke hatene lian englés. Área estudu kompostu husi edukasaun, saúde, agrikultura, sosialojiku no seluktán.
“Bolsa estudu ba tinan ida-ne’e sei iha, nune’e husu ba alin feto husi munisípiu hotu-hotu asesu ba ami-nia pajina facebook hodi konkore ba bolsa estudu Banglades nian. Tanba estudu ne’e haree liu ba ema-nia kapasidade,” nia dehan.
Tuir dadus estudante timoroan ne’ebé asesu bolsu estudu husi Asian University for Women hamutuk na’in-19 no husi númeru ne’e na’in-tolu mak ramata ona estudu no fila ona mai Timor-Leste.
Jornalista : Vitorino Lopes da Costa
Editór : Cancio Ximenes
