KOVALIMA, 03 Juñu 2025 (TATOLI) – Prezidente Autoridade Munisípiu (PAM) Kovalima, Miguel Armada Cardoso, solisita Polísia Nasionál Timor-Leste (PNTL) atu halo kontrolu ho rigór iha área risku sira iha Kovalima.
Autoridade Kovalima hato’o solisitasaun ne’e, relasiona ho akontesimentu foin lalais ne’e, sidadaun balun kesi tali fiu no ema deskoñesidu tuda sidadaun sira bainhira hala’o sira-nia viajen husi Dili mai iha Kovalima liuhusi auto-estrada parte postu administrativu Zumalai, Munisípiu Kovalima.
“Ho akontesimentu referidu, prosesu hotu PNTL sei halo investigasaun, maibé ita rona katak akontese kazu ema deskoñesidu tuda. Ha’u fó ona atensaun ba PNTL atu kontrola ho rigór área ne’ebé sempre akontese ema deskoñesidu tuda sidadaun sira”, Autoridade Kovalima, Miguel Armada Cardoso, dehan ba TATOLI iha AMC, ohin.
Líder másimu munisípiu Kovalima ne’e aleinde fó hanoin ba PNTL nia mós fó hanoin ba administradór postu administrativu no xefe suku sira atu haree oinsá bele akontese maibé seidauk hatene nia motivu.
“Ba dahuluk ida-ne’ebé dada tali fiu informasaun seidauk iha klaru, maibe ita hatene katak ema ne’ebé ho idade menór maibé ita fó fiar ona ba polísia atu haree loloos, ho aktu ita bolu delinkénsia juvenil ( kenakalan remaja) bele mós oknum ida, balun, mak tau interrese ruma atu estraga”, nia dehan.
Fó hanoin fali katak, iha loron 18 Abríl ne’e Komandante PNTL Munisípiu Kovalima, Superintendente Asistente Polísia Inacio Amaral mós koloka ona seguransa atu buka tuir autór dada fiu tali iha auto-estrada.
Aleinde iha Maiu ne’e mós kontinua akontese ema deskoñesidu tuda sidadaun sira bainhira sira hala’o sira-nia viajen husi Dili mai iha Kovalima liuhusi auto-estrada parte iha suku Tashilin postu administrativu Zumalai.
Iha loron 22 Maiu ne’e, Komisaun B ne’ebé trata asuntu negósiu estranjeiru no defeza ho seguransa mós hala’o fiskalizasaun hodi partilla pontu sira hanesan konfirmasaun situasaun enjerál seguransa, ezekusaun orsamentu no difikuldade PNTL.
Ho prezensa komisaun B parlamentu Nasionál mós preokupa ho aktu ema deskoñesidu tuda sidadaun sira bainhira husi Dili mai iha Kovalima hala’o sira-nia movimentu liuhosi auto-estrada.
Jornalista: Celestina Teles
Editór : Rafael Ximenes de A. Belo
