DILI, 11 Juñu 2025 (TATOLI)—Institutu Nasionál Farmásia Produtu no Medikamentu (INFPM), rekoñese empreza lokál Weramerigo kompra ai-moruk item neen la tuir espesífiku, nune’e INFPM fó durasaun semana rua ba empreza refere hodi substitui filafali.
“Loos duni katak Empreza Weramerigo mak kompra ai-moruk iha item balun la tuir espesífiku INFPM nian, ne’ebé mensiona ona iha kontratu nia laran. Entaun, parte INFPM foti kedas pozisaun liuhosi ekipa RNA rejeita ba item ne’ebé la tuir kontratu,” Miguel Soares ba jornalista sira, iha nia kna’ar fatin, Kampung Alor, Dili, kuarta ne’e.
Nia esplika, bainhira parte hosi Diresaun Inspesaun Ai-moruk (RNA-sigla ingleza) halo inspesaun ba produtu item neen, ne’ebé la tuir kontratu ne’e, sira komunika kedas empreza referida hodi responsabilidade, nune’e INFPM fó durasaun kuaze semana rua resin hodi substitui fali ba item sira-ne’ebé kompradu la bazeia ba kontratu.
“Hosi Diresaun Kompra nian komunika kedas ba empreza referida hodi substitui kedas. Ami fó tempu semana rua resin sira konsege substitui duni item hirak ne’ebé ami mensiona iha kontratu no hirak ne’ebé mak la mensiona iha kontratu, ka sees hosi kontratu. Agora, ami asegura hela iha parte RNA. Ba produtu sira-ne’ebé fornesedór sira mai la tuir kontratu agora daudaun ekipa RNA asegura iha-ne’ebá hein desizaun ba nia kontinuasaun. Ami seidauk fó fila bá iha parte fornesedór,” nia relata.
Miguel haktuir, Empreza Weramerigo mós kompra ai-moruk la tuir kontratu ne’ebé mak mensiona, tanba iha empreza referida kompra fali ai-moruk iha nasaun Índia maibé iha dokumentu ne’e tau fali nasaun Indonézia nia naran.
“Iha kontratu propoin dehan katak tenke ba kompra iha fábrika ida-ne’e no nasaun ida-ne’e, maibé realidade sasán tama mai, parte RNA identifika kompra fali iha nasaun seluk. Tanba ida-ne’e mak parte INFPM liuhosi ekipa RNA halo kedas rejeita hodi kontatu ba liuhosi Diresaun Kompra ikusmai fornesedór referidu konsege mai substitui fali ba item ne’ebé la tuir kontratu,” nia esplika.
Diretór ne’e mós rekoñese katak iha fornesedór mós tau fali item ai-moruk bá iha kaixa sira hanesan kaixa Le Minerál, Kaixa Kapa Api, Kaixa Good Day no kaixa sira seluk tan, nune’e Diresaun INFPM fó xamada ba empreza referida hodi substitui filafali kaixa sira-ne’e.
Iha item neen mak la tuir kontratu nian. Só item tolu mak substituidu ona. Item neen (6) mak hanesan Cloxacillin 500 MG Scored Tab, item Polymyxin+Bacitracin 5000+400, item Chlorine Hypochlorite 5%(1L), item Chloramphenic ol Sodium Suspension 0,5g(2ml), item Podophyllin Paint Spray no item Sulfasalazine 500mg.
Ezekusaun OJE 2025 INFPM atinje ona 15%
Entretantu, Institutu Nasionál Farmásia, Produtu no Medikamentu (INFPM) ezekuta ona Orsamentu Jerál Estadu (OJE) tinan 2025 ba trimestre dahuluk hosi fulan-Janeiru to’o mai iha fulan-Marsu nia laran ho pursentu 15.
“Enjerál, orsamentu jerál 2025 ne’ebé aloka ba iha INFPM hamutuk $16.431.180,00. Husi orsamentu ne’e, ezekuta ona 15%. Ne’e inklui ona saláriu no mós operasionál sira,” Miguel Soares afirma.
Nia haktuir, orsamentu referidu bá iha saláriu no vensimentu, kustu operasionál sira no maioria ezekuta ba kompra ai-moruk, infraestrutura inklui mós oxijéniu.
Tuir portál transpárensia ne’ebé TATOLI asesu, husi Janeiru to’o loron 11 Juñu tinan ne’e, husi orsamentu alokadu hamutuk $16.431.180, 00 ne’e, ezekuta ona 35,9%, kompromisu sira $863.469,08, obrigasaun sira $3.882.007,13, atuál $2.019.828,58 no saldu $ 9.665.875,21.
Jornalista: Felicidade Ximenes
Editór: Xisto Freitas da Piedade
