KOVALIMA, 17 Juñu 2025 (TATOLI) – Prokuradór Jerál Repúblika (PJR), Nelson de Carvalho, Tersa-ne’e, hala’o vizita traballu hodi observa situasaun no kondisaun servisu prokuradór no ofisiál justisa sira-nian iha Ministériu Públiku (MP) Munisípiu Kovalima.
“Ha’u mai vizita Ministériu Públiku Kovalima hafoin ha’u simu pose sai prokuradór jerál iha loron 12 Maiu. Vizita ida-ne’e hanesan vizita traballu hodi hala’o reuniaun ho prokuradór ne’ebé kolokadu ho ofisiál justisa sira inklui ho sira ne’ebe servisu administrasaun iha Ministériu Públiku”, Nelson de Carvalho, dehan ba jornalista sira iha salaun MP Kovalima, ohin.
PJR viajen husi Dili mai iha Kovalima iha loron 16 Juñu hodi hala’o atividade sira hanesan hala’o reuniaun ho prokuradór ne’ebé kolokadu, ofisiál justisa no funsionáriu ne’ebé servisu iha administrasaun iha Munistériu Públiku (MP) .
Ho prezensa prokuradór Jerál Repúbliku (PJR) oinsá atu haree servisu durante ne’e no mós haree ekipamentu kona-ba fatin atu asegura evidénsia, oinsá hodi haree situasaun no kondisaun sira ne’e, iha prokuradória primeira instánsia Munisípiu Kovalima.
Iha loron 17 ne’e hala’o reuniaun ho parte Komandante PNTL Munisípiu Kovalima no parte seksaun polísia investigasaun, Komandu Unidade Polísia Fronteira (UPF), Alfándega no imigrasaun, tanba Kovalima hanesan ho Munisípiu Bobonaro Inklui Oe-kusi; situasaun territóriu iha fronteira viziñu ho Indonézia.
“Ha’u mai ko’alia ho sira oinsá atu kuda lasu amizade servisu liliu kazu ne’ebé relasaun ho prosesu kontra bandu, sidadaun ultrapasa ho dalan ilegál no prosesu krime sira servisu ne’ebé relasaun ho krimi”, PJR relata.
Durante PJR realiza enkontru, kada unidade sira aprezenta preokupasaun hanesan husi komandu PNTL la iha transporte tanba polísia investigasaun simu mandadu notifikasaun husi prokuradór atu notifika intervenente-sira la iha transporte hodi difikulta servisu, presiza fasilita formasaun no fatin atu asegura evidénsia.
“Munisípiu Kovalima iha nia postu administrativu hitu bainhira hala’o notifikasaun, formasaun ha’u rasik kestaun ida-ne’e hanesan mós iha Oe-kusi. Ha’u rasik kria ekipa diagnóstika husi adjuntu prokuradór Jerál Jacinto Babo ho nia ekipa atu mai haree kona-ba kondisaun no situasaun iha Ministériu Públiku rasik”, nia dehan.
Fatin atu asegura materiál ka evidénsia sira ne’e mak Polísia ho mós Ministériu Públiku hasoru difikuldade, ladun favoravel atu rai sasan liliu hanesan sigarru, mina no motorizada.
Ho nune’e ba futuru presiza atu haree fatin hodi asegura materiál krimi ka evidénsia. Daudaun sei uza nafatin meiu ne’ebé uza liliu mak atu kontrola bainhira evidénsia finaliza ona julgamentu atu bele halo destruisaun.
Jornalista:Celestina Teles
Editór: Rafael Ximenes de A. Belo
