OEKUSI, 04 Jullu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Sekretáriu Rejionál ba Asuntu Administrasaun, kansela planu rekrutamentu ofisiál apoia suku na’in-ualu ba suku foun Monemeko no Kutete tanba Governu suspende direitamente liuhusi desizaun Konsellu-Ministru.
Notísia relevante:Autoridade RAEOA planu rekruta ofisiál suku na’in-ualu ba Monemeko-Kutete
Sekretáriu Rejionál ba Asuntu Administrasaun, Andre La’o, informa, suku Monemeko ho Kutete foin eleitu iha 2025, loloos presiza hetan ofisiál apoia suku, atu atende ba asuntu sosiál suku no administrasaun suku nian.
“Iha fulan Abríl foin lalais ne’e, Prezidente Autoridade aprova ona atu halo rekrutamentu hanesan mós suku 18 seluk, depois desizaun husi Konsellu-Ministru fó sai katak suspende rekrutamentu ba funsionáriu inklui asesór, ho razaun katak tinan ne’e Governu konsentra hadi’a administrasaun, entaun ida-ne’e inklui mós planu atu rekruta ofisiál apoia ba suku foun rua ne’e, ne’ebé agora ita kansela, tanba Governu deklara ona atu labele halo rekrutamentu foun,” Andre La’o, dehan iha Oekusi, ohin.
Nia hateten, orsamentu ba rekrutamentu ofisiál apoia suku hamutuk na’in-ualu, hodi koloka ba suku foun Kutete no Monemeko integra ona iha Planu Asaun Anuál (PAA) 2025, tanba planu estabelese suku foun rua ne’e inísia kedas iha 2024 hodi sai suku iha tinan ne’e.
“Agora ita muda fali ba tinan oin 2026, nia orsamentu sei tau nafatin iha PAA tinan oin, tanba suku 18 seluk, sira iha ona ofisiál apoia suku, ne’ebé ita espera autoridade lokál no komunidade sira iha Kutete no Monemeko, atu pasiénsia hodi hein desizaun Governu nian liuhusi Konsellu-Ministru, kona-ba planu rekrutamentu ba ofisiál suku,” nia apela.
Notísia relevante:Mandatu Komisaun Ezekutiva ZEEDOA estende tan ba fulan haat
Entretantu, antes ne’e Konsellu-Ministru deside hodi halo suspensaun temporária ba rekrutamentu funsionáriu públiku foun, ho objetivu atu garante jestaun rekursu umanu Estadu nian ne’ebé efisiente no sustentavel liután.
Desizaun ne’e fó sai depoizde halo análize ba pontu situasaun ba prosesu Reforma Jestaun Rekursu Umanu iha Administrasaun Públika, neʼebé aprezenta husi Prezidente Komisaun Funsaun Públika, Agostinho Letêncio de Deus.
“Medida ne’e halo hanesan parte husi preparasaun ba propostas estruturais ne’ebé lidera husi Grupu Traballu ba Reforma Jestaun Rekursus Umanus iha Administrasaun Públika, neʼebé inklui, entre komponente seluk, define númeru ideál husi forsa traballu, kria paradigma foun ida ba sistema karreira iha Administrasaun Públika”, dokumentu husi Governu ne’e hateten.
Suspensaun ne’ebé daudaun aprova, aplika ba prosesu ingresu funsionáriu públiku foun no la inklui prosesu selesaun tuir méritu ba kargu diresaun no xefia no funsionáriu sira ne’ebé hala’o funsaun ho karáter espesiál, inklui rekrutamentu ba Ajente Administrasaun Públika.
Durante períodu neʼebé nesesáriu, medida ida-ne’e sei mantein, hodi analiza dimensaun ideál Funsaun Públika nian no hodi aprezenta paradigma foun ida ba sistema karreira iha Administrasaun Públika.
Tuir dadus atualizasaun iha baze SIGAP KFP, funsionáriu permanente inklui ajente administrasaun públika ativu hamutuk 39.380, neʼebé kompostu husi feto 14.115 no mane 25.265.
Husi númeru ne’e, funsionáriu permanente 33.004 no ajente administrasaun públika 6.376.
Notísia relevante:Governu suspende temporáriu rekrutamentu ba funsionáriu públiku foun
Jornalista: Abílio Elo Nini
Editór: Rafael Ximenes de A. Belo
