OEKUSI, 14 Abríl 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Sekretáriu Rejionál ba Asuntu Administrasaun, planu loke konkursu públiku hodi rekruta ofisiál na’in-ualu atu apoia servisu administrasaun iha suku foun hanesan Monemeko ho Kutete.
Sekretáriu Rejionál ba Asuntu Administrasaun, Adre La’o, hateten ofisiál na’in-ualu ne’e atu koloka ba suku Monemeko na’in-haat ho Kutete na’in-haat, ho funsaun atu apoia servisu administrasaun suku, asuntu finansa no sosiál nian.
Notísia relevante:MAE pose xefe suku eleitu Kutete no Monemeko iha Oekusi
“Ita sei halo rekrutamentu ba pesoál apoia suku ema na’in-ualu atu destaka ba suku Monemeko no Kutete atu ajuda xefe suku rua-ne’e, ba programa administrasaun atendimentu suku sira nia orsamentu ita prevee ona iha tempu badak ita sei loke konkursu, hanesan funsionáriu kontratu, maibé ba futuru sei promove sira ba ajente,” nia hateten iha Oekusi,ohin.
Kona-ba motorizada no uniforme ba xefe suku foun rua ne’e, to’o agora seidauk bele hetan tanba tinan ne’e Autoridade RAEOA foin aposta iha Planu Asaun Anuál (PAA) Orsamentu Jerál Estadu (OJE) 2026 nian kada suku hetan motorizada rua ho uniforme ba xefe suku Kutete no Monemeko.
“Ba fatin edifisíu suku nian eziste ona kadeira no meja antes ne’e, Sekretáriu Rejionál Administrasaun apoia ona unidade 50, foin daudaun simu pose, Governu Sentrál liuhusi Ministériu Administrasaun Estatál (MAE) mós apoia ona komputadór ho printer unidade rua kada suku,” nia afirma.
Notísia relevante:CNE nota eleisaun órgaun suku iha Kutete-Monemeko la’o di’ak
MAE distribui materiál eletrónika ba suku 20 iha Oekusi
Jornalista: Abílio Elo Nini
Editór: Florencio Miranda Ximenes
