OEKUSI, 04 Abríl 2025 (TATOLI)– Ministériu Administrasaun Estatál (MAE) liuhusi Sekretáriu Estadu Dezenvolvimentu Lokál (SEDL), Mateus Wilfridos do Santos Tallo, akompaña husi Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago de Fátima Lobato, sesta ne’e, fó tomada pose ba Konsellu Suku Kutete no Monemeko iha Oekusi ba mandatu tinan hitu husi 2025 to’o 2032.
Iha diskursu, Sekretáriu Estadu Dezenvolvimentu Lokal (SEDL), Mateus Wilfridos do Santos Tallo, rekomenda atu xefe suku sira apoia servisu Governu hodi tau matan ba implementasaun Programa Nsionál Dezenvolvimentu Suku (PNDS) no hadi’a administrasaun suku nian.
Notísia relevante:Profíl suku pilotu Kutete Oé-Cusse
“Husu ba ita bo’ot sira atu haree no tau matan ba programa sira liga ba suku, exemplu PNDS, merenda eskolár, atu kontinua tau-matan iha implementasaun loron-loron nian, ajuda no konsolida servisu administrasaun sira liuliu demográfia tanba ita bo’ot sira suku foun presiza identifika fila-fali, komunidade hira mak iha aldeia, bele haree no ajusta dadús sira liga ho demográfia, nune’e bele ajuda autoridade RAEOA hodi hahú prosesu planeamentu, programa no orsamentu sira ba tinan tuir mai,” nia rekomenda iha ámbitu simu pose ne’e.
Iha biban hanesan, Xefe suku Kutete, José António Bana, kompromete sei servisu ho responsabilidade hodi halakon diferénsia polítika iha suku hodi fó atendimentu dignu ba komunidade sira.
“Ha’u-nia kompromisu, prontu servisu ba komunidade nia nesesidade moris, ha’u sei la hili no hafahe komunidade sira tanba de’it diferénsia kór partidu ka relijiaun no Ema ho Defisiénsia (EhD), maibé ha’u sei fó atendimentu ba hotu-hotu ho dignidade iha suku laran, ida-ne’e papél bo’ot mai ami Konsellu Suku ne’ebé foin eleietu ne’e,” nia promete.
Notísia relevante:MAE diálogu ho komunidade Monemeko Oé-Cusse prepara sai suku iha 2024
Entretantu, Xefe suku Monemeko, José Sani, informa misaun dahuluk sei hadi’a hikas dadús populasaun no identifika idozu, invalidés inklui kbi’it la’ek sira.
“Ohin, ha’u simu ona tomada pose, komesa halo ona servisu ba komunidade sira liuliu atendimentu servisu, saida mak sei halo uluk mak, ha’u sei rekolla dadús idozu-invalidéz sira, kbi’it laek sira, totál populasaun husi labarik to’o ferik katuas, to’o agora seidauk iha tanba dadús ne’e diferente tebes, ne’ebé dadús provizóriu iha mak populasaun 1.950 husi uma-kain 842,” nia dehan.
Daudaun ne’e, RAEOA iha suku hamutuk 20 ho sub-rejiaun haat, Oésilo, Pássabe, Nítibe no Pante Makasar.
Notísia relevante:Governu sei avalia suku hitu iha Oé-Cusse molok válida sai suku foun
Jornalista: Abílio Elo Nini
Editór: Evaristo Soares Martins
