DILI, 11 Juñu 2025 (TATOLI) – Governu halo alterasaun dahaat ba Rezolusaun Governu númeru 7/2024, loron 24 fulan-Janeiru, kona-ba Kriasaun Komisaun Ezekutiva ho objetivu atu estabelese Zona Ekonómika Espesiál Dezenvolvimentu iha Oekusi Ambenu (ZEEDOA).
Tuir dokumentu ne’ebé Tatoli asesu, alterasaun ida-ne’e hanaruk mandatu Komisaun Ezekutiva ba fulan haat (Juñu to’o Setembru) no durante períodu ida-ne’e bandu kontratasaun ba funsionáriu públiku, tékniku no asesór foun, tantu ba órgaun administrativu Rejiaun Administrativa Espesiál Oe-Cusse Ambeno (RAEOA) no ba Komité Ezekutivu ZEEDOA nian.
“Prezidénsia Konsellu Ministru nian tenke prepara dokumentu tékniku no jurídiku sira ne’ebé presiza ba kriasaun estrutura funsionál foun ida iha RAEOA, ne’ebé besik hanesan ho rejime munisipál ne’ebé adota iha divizaun administrativa sira seluk país nian, iha ne’ebé Atoni (Oekusi-oan) sira bele asume responsabilidade ba jestaun administrativa no ekonómika Rejiaun nian”, dehan.
Komisaun Ezekutiva ZEEDOA ne’e rasik daudaun lidera husi João Mendes Gonçalves nu’udar koordenadór.
Lembra katak, Koordenadór ZEEDOA ho nia estrutura termina ona mandatu iha 31 Maiu 2025, no foin lalais hasoru malu ho Primeiru-Ministru, Xanana Gusmão, hodi ko’alia kona-ba destinu ZEEDOA nian.
Objetivu husi sorumutu ne’e atu husu orientasaun no indikasaun husi xefe Governu kona-ba futuru ZEEDOA nian, maibé tanba primeiru-ministru okupadu tebes no foin lalais halo viajen ASEAN nian, entaun seidauk iha tempu atu haree asuntu sira ne’e hotu.
“Ne’e duni nia deside estende ami-nia mandatu to’o tempu ne’ebé nia presiza prepara buat hotu. Entaun, estende ne’e to’o tempu neʼebé primeiru-ministru no Konsellu Ministru foti desizaun kona-ba futuru ZEEDOA nian”, João Gonçalves hateten foin lalais ne’e iha Palásiu Governu.
Notisía relevante: Mandatu ZEEDOA hein desizaun foun husi Primeiru-Ministru
Jornalista: Arminda Fonseca
Editora: Maria Auxiliadora
