DILI, 09 Jullu 2025 (TATOLI)—Ministru Negósiu Estranjeiru no Kooperasaun, Bendito dos Santos Freitas no Vise-Ministra ba Asuntu ASEAN ho delegasaun, partisipa iha abertura Enkontru Ministru Negósiu Estranjeiru ASEAN ba da-58 ne’ebé hala’o iha Sentru Konvensaun Kuala Lumpur-Malázia
Notísia Relevante: Pozisaun Myanmar la’ós problema ba TL sai membru plenu ASEAN
Primeiru-Ministru Malázia, Datuk Seri Anwar Ibrahim, husu ba nasaun membru ASEAN sira atu fó apoiu másima ba Timor-Leste bele sai membru plenu ba organizasaun rejionál ne’e, iha simeira ASEAN ba da-47 ne’ebé sei hala’o iha Outubru 2025 iha Malázia.
Serimónia abertura Reuniaun Ministru Negósiu Estranjeiru ASEAN ba da-58 ne’e, partisipa husi Ministru Negósiu Estranjeiru no Kooperasaun sira husi nasaun membru ASEAN.
“Ha’u agradese dala ida tan ba Sekretariadu ba fasilidade no ha’u husu ba Estadu membru hotu-hotu atu kontinua apoia Timor-Leste ba integrasaun tomak la’ós de’it ba ita-nia instituisaun sira ba rejiaun nia futuru,” Primeiru-Ministru Malázia, Anwar Ibrahim, hateten liuhusi nota imprensa ne’ebé Agência Tatoli asesu, ohin.
Xefe Governu Malázia ne’e subliña, Inkluzividade no Sustentabilidade hanesan tema prinsipál ne’ebé orienta Malázia nia Prezidente ASEAN 2025, ne’ebé foka ba haburas unidade no dezenvolvimentu sustentável iha rejiaun tomak.
“Liuliu sentralidade ASEAN nian tenke sai ita-nia fitun norte, hanesan reflete husi fortalesimentu no inovasaun kontínua husi instituisaun legál sira ASEAN nian. Ita tenke sai nafatin rejiaun nia ânkora prinsipál ba diálogu iha parte ne’ebé ita-nia parseiru diálogu sira tenke kontinua hetan valór hodi envolve ho ita,” PM Ibrahim dehan.
Nia akeresenta, importánsia husi Unidade no Sentralidade ASEAN nian iha tensaun jeopolítika no inserteza jeoekonómika ne’ebé aumenta, hodi reafirma ASEAN nia papél nu’udar forsa estabilizadora iha rejiaun.
Avansa integrasaun ASEAN no harii komunidade, inklui kooperasaun iha área kreximentu emerjente sira hanesan ekonomia dijitál, enerjia verde, no konetividade kadeia fornesimentu.
Malázia nia kompromisu ba polítika esterna ida-ne’ebé neutru no la aliña, hodi fó prioridade ba kooperasaun ekonómika no estabilidade rejionál liuhosi kobertura estratéjiku.
Preparasaun ba admisaun Timor-Leste nian nu’udar membru ASEAN ba da-11, ne’ebé hein iha Simeira ASEAN ba da-47 iha tinan 2025 nia rohan, ne’ebé fó sinál ba espansaun no inkluzividade ASEAN nian.
Hametin diálogu no kooperasaun ho Parseiru Diálogu ASEAN nian hodi rezolve dezafiu rejionál no globál sira ho koletivu.
Kontinua fó énfaze ba organiza ambiente enkontru ida ne’ebé seguru, moos no preparadu ho di’ak iha Kuala Lumpur hodi fasilita envolvimentu diplomátiku ne’ebé efetivu.
Notísia Relevante: PM Malázia ‘esforsu estra’ hodi promove TL nia integrasaun ba membru plenu ASEAN
Jornalista : Hortencio Sanchez
Editór : Cancio Ximenes
