OEKUSI, 10 Jullu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA) hamutuk ho Diresaun Rejionál Infraestrutura (DRI) no Ajénsia Dezenvolvimentu Nasionál Intititutu Públiku (ADN, I.P), kinta ne’e, entrega orden servisu ba empreza 154 atu implementa projetu emerjénsia, ne’ebé aprova ona husi Konsellu Administrasaun Fundu Infraestrutura (KAFI) ba dahaat no dalima.
Notísia relevante:KAFI Oekusi aprova projetu emerjénsia 26 ho kustu millaun $36-resin
Diretór Diresaun Rejionál Infraestrutura, Remígio Nuno Sila, informa, informa, empreza 154 ne’e, maioria Oekusi-oan no balun mai husi rai-boot.
Nia esplika, orden servisu ne’e fahe ba empreza sira, atu halo preparasaun, kona-ba mobilizasaun materiál, prepara traballadór, prepara fatin iha terrenu tenke hahú ona, maibé kona-ba kontratu, sei Prezidente Autoridade RAEOA tanba daudaun ne’e sei halo servisu iha nasionál,
“Ohin ita fahe orden servisu ba kompañia sira, tanba sira-nia proposta, mak Autoridade hamutuk ho DRI no ADN, deside atu implementa projetu emerjénsia ba komunidade sira, ne’ebé ohin iha lista 154, dadús ne’e seidauk fiksu tanba sei hein asinatura husi Prezidente Autoridade, mak ita foin hatene lista finál, empreza hira mak sei implementa projetu emerjénsia husi KAFI dahaat no Dalima,” Remígio Nuno Sila dehan, iha salaun IADE Oekusi, ohin.
Nia informa, projetu emerjénsia ne’ebé aprova husi KAFI ba dahaat no dalima maioria reabilitasaun estrada rurál, tuirmai protesaun morru ka gabiaun atu proteje natar, to’os, no iha edifikasaun balun no elétrisidade, tanba fatin balun iha sub-rejiaun sira seidauk asesu ahi.
“Tanba iha KAFI daruak iha maibé la konsege ezekuta, nune’e iha KAFI dalima ne’e, ita agradese tanba bele iha tan atu fó namoran ba komunidade sira-ne’ebé hela do’ok husi estrada, tanba iha estrada-ninin maioria asesu ona,” nia hateten.
Notísia relevante:KAFI prioriza projetu reabilitasaun estrada iha Oekusi
Iha biban ne’e, Sekretáriu Rejionál ba Asuntu Administrasaun, Andre La’o, rekomenda ba empreza sira atu hatudu responsabilidade no garante kualidade, tanba gasta osan Estadu tenke fó benefísiu direita ba komunidade sira iha área rurál.
“Ohin imi simu ona orden servisu, mensajén ne’ebé Autoridade fó mak ne’e, responsabilidade, labele hetan de’it projetu maibé servisu lala’o, obra laiha kualidade. Ha’u husu ita gasta osan Estadu tenke garante projetu nia kualidade, labele manán osan de’it maibé servisu la ramata, ida-ne’e ami husu, hadomi ita-nia rai, foin daudaun Primeiru-Ministru mai, husu atu garante kualidade liuliu reabilitasaun estrada sira, atu fasilita komunidade asesu ba merkadu,” nia apela.
Notísia relevante:CAC kontinua kontrola kualidade projetu KAFI rejionál iha Oekusi
Tuir dokumentu neʼebé Ajénsia TATOLI,I.P asesu iha Diresaun Rejionál Infraestrutura (DRI) katak, KAFI dahuluk konsege ezekuta projetu hamutuk tolu (3), KAFI daruak ezekuta projetu ualu (8) projetu lima kona-ba reabilitasaun estrada rurál sira, ponte rua no gabiun ida no KAFI datoluk mak ezekuta projetu 27.
Jornalista: Abílio Elo Nini
Editór: Rafael Ximenes de A. Belo
