OEKUSI, 12 Marsu 2025 (TATOLI) – Diretór Diresaun Rejionál Infraestrutura (DRI), Remigío Nuno Sila, informa desizaun husi Konsellu Administrasaun Fundu Infraestrutura (KAFI), Rejiaun Administrativa Espesiál Oekusi Ambeno (RAEOA), aprova ona projetu emerjénsia 26 ho kustu $36,928,720.47, ne’ebé aloka mai husi fundu infraestrutra nasionál atu ezekuta iha tinan ne’e.
“Iha KAFI rejionál datoluk tinan ne’e iha projetu 28 maibé kompañia rua mak la priénxe rekejitu, entaun 26 kompañia mak hetan ona ordén servisu husi Diresaun Rejionál Infraestrutura no hein desizaun finál husi Ajénsia Dezenvolvimentu Nasionál (ADN) atubele implementa projetu emerjénsia hamutuk 26 iha tinan ne’e,” Remigío Nuno Sila ba jornalista sira iha Oekusi, ohin.
Notísia relevante:PM Xanana rekomenda ba empreza kontinua fui semente ba estrada Taibako-Usitaku no Lelaufe
Tipu projetu 26 mak hanesan tipu konstrusaun tolu mak hanesan, reabilitasaun estrada rurál no pavimentasaun rai hamutuk projetu 9, morru protesaun ba mota sira ka gabiaun iha projetu 16 no reabilitasaun edifisíu iha projetu tolu atu reabilita sede suku no kapela ida inklui kazerna PNTL eskuadra sub-rejiaun Pássabe.
“Projetu 26 ne’e kabe ba sub-rejiaun haat, Oésilo mós hetan, Pássabe, Nítibe no Pante Makasar rasik, ho totál orsamentu $36,928,720.47, maibé ida-ne’e seidauk fixu depoisde verifikasaun proposta husi ADN dalaruma tun ou sa’e, maibé aprovadu mak 26 ne’e,” nia dehan.
Notísia relevante: KAFI Rejionál sei buka solusaun ba problema reabilitasaun estrada Oébaha bá Bitopa
Kompañia sira daudaun ne’e simu ona ordén servisu, kona-ba selebrasaun kontratu sei hein verifikasaun tanba proposta ne’ebé submete husi kompañia sei hetan verifikasuan husi Diresaun Rejionál Infraestrutura, hafoin ne’e enkamiña ba iha Ajénsia Dezenvolvimentu Nasionál (ADN) hodi halo tan verifikasaun.
“Depoizde verifikasaun mak sira haree kontratu ne’ebé termina husi verifikasaun ne’e rasik, maibé oras ne’e daudaun ita-nia parte jurídiku mós hetan ona informasaun oinsa bele prepara kontratu, maibé depoisde verifikasaun,” nia hateten.
Entretantu, tuir dokumentu ne’ebé Ajénsia TATOLI,I.P asesu iha Diresaun Rejionál Infraestrutura (DRI) katak, KAFI dahuluk konsege ezekuta projetu hamutuk tolu (3), KAFI daruak ezekuta projetu ualu (8) kompostu projetu lima kona-ba reabilitasaun estrada rurál sira, ponte rua no gabiun ida, no KAFI datoluk mak sei ezekuta projetu 26 iha tinan ne’e.
Notísia relevante:Autoridade RAEOA ho Lian-na’in realiza seremónia kulturál hodi reabilita estrada rurál iha Sabén
Jornalista: Abílio Elo Nini
Editór: Florencio Miranda Ximenes
