OEKUSI, 19 Fevereiru 2025 (TATOLI)- Primeiru-Ministru (PM), Kay Rala Xanana Gusmão, hala’o observasaun ba projetu emerjénsia reabilitasaun estrada rural ligasaun husi Suku Taiboko, Sub Rejiaun Pante Makasar, kobre Suku Usitaku, Sub Rejiaun Nitibe, to’o suku Lela-Ufe, Sub Rejiaun Nitibe, Rejiaun Administrativa Espesiál Oekusi Ambeno (RAEOA).
Rebilitasaun projetu emerjénsia ne’e ezekuta husi kompañia Raynaldo’s Unipesoál Lda, ho distánsia kilometru 14,35, hahú husi Oétako suku suku Taiboko to’o Huekolen suku Lela-Ufe sub-rejiaun Nítibe ho valór kontratu $393,995.01.
Alende ne’e, projetu reabilitasaun estrada kilometru 6,7, husi husi Fatukenfua suku Usitako liga ba Lamasin suku Bene-Ufe sub-rejiaun Nítibe, ezekuta husi kompaña Colneno Unipesoál Lda ho valór kontratu $385,119.17.
Notísia relevante:PM Xanana vizita Oekusi hodi observa progresu serbisu no funsionamentu administrasaun
“Reabilitasaun estrada uza de’it rai henek no rai mutin, nune’e bele hetan estragu iha tempu udan no hamosu rai rahun iha tempu bailoron, nune’e ha’u propoin ba Prezidente Autoridade RAEOA no Diresaun Rejionál Infraestrura (DRI) hodi orienta empreza sira-ne’ebé halo reabilitasaun estrada rurál atu tau fui semente no tau besi-beton tanba imi (komunidade) iha ne’e karreta ladun la’o bá mai, ne’ebé laiha problema,” PM Xanana hateten hafoin vizita komunidade iha sede suku Taiboko, ohin.
Xefe Governu halo observasaun ba projetu ne’e tanba Prezidente Autoridade RAEOA, Rogério Tigao Lobato rasik mak husu, iha ámbitu vizita durante loron 5 hahú husi 17 to’o 21 Fevereiru iha RAEOA.
“Ha’u mai iha ne’e tanba Prezidente Auotridade mak husu atu mai haree estrada ne’e. Povu iha área rurál presiza tebtebes mak infraestrutura bázika. Ha’u kontente tanba estrada ne’e reabilita ona. Maibé tenke halo ho fazeadamente. Nune’e ita halo uluk ho sementu depois iha tempu seluk mak ita bele tau alkatraun”, Xefe Governu afirma.
Ho reabilitasaun ne’e, Xanana Gusmão dehan projetu emerjénsia ba reabilitasaun estrada ne’e hodi fasilita di’ak liu-tan movimentu komunidade, liu-liu ferik no katuas sira atu bele transporta sira-nia produtu ba Oekusi vila hodi bele fa’an atu bele sustenta moris.
Iha fatin hanesan, Diretór Diresaun Rejionál Infraestrutura, Remigío Nuno Sila, informa projetu sira-ne’ebé iha ho tipu emerjénsia hamutuk projetu lima mak implementa iha Oekusi kabe ba sub-rejiaun haat hanesan, iha sub-rejiaun Nítibe projetu rua, Pante Makasar ida, iha sub-rejiaun Oésilo ida no sub-rejiaun Pássabe ida.
“Ohin ita observa Taiboko nian mai to’o Usitako, ita simu rekomendasaun lubun husi Primeiru-Ministru, katak projetu emejénsia sira-ne’e, tenke tau mós ho pavimentu liuhusi fui sementu ho beton ka plant-konkrit, entaun husi DRI sei banati rekomendasaun sira-ne’e, no sei hato’o ba Prezidente Autoridade RAEOA, nune’e itabele aplika fui betong iha kontrusaun daudaun implementa, ne’ebé projetu ne’ebé ohin Primeiru-Ministru observa nia progresu atinje ona 46%,” nia informa.
Durante prosesu reabilitasaun, Diretór Kompañia Rynaldós Unip Lda, Rofino da Costa Rao sempre halo uluk diálogu ho komunidade no hetan apoiu másimu liu-liu iha kooperasaun di’ak tebtebes entre komunidade ho tékniku sira no laiha impedimentu ruma, nune’e fiar katak sei konklui tuir kontratu ne’ebé iha.
Durante observasaun, komunidade ho kontente hein hodi simu Primeiru-Ministru iha sira-nia fatin hodi agradese tanba bele asesu bá estrada.
Antes ne’e, Prezidente Autoridade RAEOA, Rogério Tiago Lobato hateten katak, projetu reabilitasaun estrada ne’e ezekuta tanba hetan orientasaun husi Primeiru-Ministru hodi bele tulun movimentu komunidade iha área izoladu.
Vizita ne’e akompaña husi Diretór Ajénsia Dezenvolvimentu Nasionál (ADN), Rui Lourenço da Costa, Diretór Kompañia Rynaldós Unip Lda, Rofino da Costa Rao, parte Obras Públika Rejionál, Autoridade Protesaun Sivíl Rejionál, Komandante PNTL RAEOA no seguransa.
Notísia relevante:PM Xanana rekoñese estrada barak kondisaun aat
Jornalista: Abílio Elo Nini
Editór: Florencio Miranda Ximenes
